Казахстан вырашыў зусім скасаваць смяротнае пакаранне. Мараторый на яго быў з 2004 года
Адпаведны законапраект ухваліў Сенат. Каб гэта стала законам, патрэбны яшчэ подпіс прэзідэнта, а дзейны прэзідэнт і даў распараджэнне падрыхтаваць законапраект, а раней выказваўся за безагаворачнае скасаванне смяротнага пакарання.
Сенат Казахстану 23 снежня ўхваліў законапраект аб поўным скасаванні смяротнага пакарання. Закон цяпер павінен падпісаць кіраўнік Казахстану Касым-Жамарт Такаеў. Хутчэй за ўсё, ён гэта зробіць, бо нядаўна ён казаў, што смяротнае пакаранне ў Казахстане мусіць быць скасаванае без усялякіх агаворак.
Мінулы кіраўнік Казахстану Нурсултан Назарбаеў у канцы 2013 года абвясціў аб бестэрміновым мараторыі на смяротнае пакаранне. Яно заставалася выключным захадам для асуджаных за тэрарызм ці асабліва цяжкія злачынствы ў ваенны час, але фактычна не ўжывалася. Найвышэйшай мерай пакарання ад 1 студзеня 2004 года ў Казахстане было пажыццёвае зняволенне.
Ад здабыцця незалежнасці і да 2004 года ў Казахстане выканалі 536 смяротных прысудаў праз расстрэл. Пасля мараторыю смяротныя выракі прысуджалі, але не выконвалі. Смяротнае пакаранне не ўжывалі адносна жанчын, непаўналетніх і пажылых.
Беларусь па-ранейшаму застаецца адзінай краінай Еўропы, дзе ўжываецца смяротнае пакаранне.
АА belsat.eu
