Жыхары памежных сёлаў Белгарадскай вобласці Расеі падчас прамой лініі «10 пытанняў губернатару» паскардзіліся кіраўніку вобласці Вячаславу Гладкову на марадзёраў. Пра гэта паведамляюць мясцовыя медыі.
Гэтак, адна жанчына паведаміла, што ў сёлах Чырвоны Хутар і Новая Навумоўка невядомыя ходзяць па дамах і выносяць чужую маёмасць. Яна папрасіла ўзмацніць ахову і патруляванне ў гэтых вёсках.
Вячаслаў Гладкоў назваў падобныя выпадкі крадзяжом і марадзёрствам. Выпадкі крадзяжу ў памежных з Украінай сёлах таксама пацвердзіў і кіраўнік Белгарадскага раёну Уладзімір Перцаў.
«Цяпер там штодня адбываюцца абстрэлы. Паўнавартасна забяспечыць гэтыя тэрыторыі аховай не атрымаецца. Мы не можам рызыкаваць жыццём паліцыянтаў і расгвардзейцаў. У рамках аператыўнай абстаноўкі будзем прымаць меры для таго, каб захаваць вашу маёмасць», – сказаў губернатар.
Таксама 15 кастрычніка адзін са снарадаў патрапіў у нафтабазу ў Белгарадскім раёне. Апроч таго, паведамляецца, што з боку Украіны абстралялі мытны пункт пропуску ў Шабекінскай гарадской акрузе.
З прычыны штодзённых абстрэлаў дзяцей у вобласці накіравалі на заўчасныя вакацыі.
Якуб Хруст belsat.eu
