Прычынай дэфектаў у доме № 3 на вуліцы Шырокай у Менску стала выкарыстанне бетону ніжэйшага класа, чым патрабавала праектная дакументацыя. Таксама выяўленыя парушэнні тэхналогіі выканання маналітных прац.
Эксперты прыйшлі да высновы, што неабходна ўмацаваць 11 калонаў. 10 з іх знаходзяцца ў склепе, адна – на ўзроўні першага паверха, паведамляюць «Минск-Новости».
У першую чаргу спатрэбіцца ліквідаваць дэфекты трох калонаў: адной у трэцім пад’ездзе і двух у склепе другога падʼезда.
«Стан калон некрытычны і бяспечны. Каб перадухіліць іх далейшае разбурэнне, канструкцыі ўзмоцняць падоўжнымі металічнымі куткамі, папярочнымі планкамі і арматурнай сеткай па ўсім перыметры», – распавяла начальніца вытворчага аддзелу ЖКГ Савецкага раёну Алена Сцяфанава.
Зараз ідуць перамовы па выбары падрадчыка. Працы плануецца выканаць за месяц. Пасля гэтага будаўнікі зоймуцца астатнімі калонамі.
МГ belsat.eu