Кіраўнік ураду Расеі Дзмітрый Мядзведзеў падпісаў распараджэнне аб стварэнні супольнай працоўнай групы, якая будзе займацца спрэчнымі пытаннямі ў працэсе інтэграцыі Беларусі і Расеі, паведамляе interfax.ru.
Паводле Мядзведзева, з расейскага боку групу ўзначаліць міністр эканамічнага развіцця Максім Арэшкін. Хто ўзначаліць беларускі блок у гэтай групе пакуль не вядома.
Расейскі прэм’ер удакладніў, што «туды ўвойдуць прадстаўнікі ўсіх ведамстваў – і не толькі ўрадавых».
Рашэнне аб стварэнні групы было прынятае 25 снежня ў Маскве падчас сустрэчы прэзідэнта Расеі Уладзіміра Пуціна і кіраўніка Беларусі Аляксандра Лукашэнкі.
29 снежня ў Маскве адбудзецца яшчэ адна сустрэча Лукашэнкі і Пуціна, на якой будуць абмяркоўвацца кошты на энерганосьбіты для Беларусі і падатковы манеўр Расеі.
ЮВ, belsat.eu