Чаго не чакаем у 2021-м ад рынку жылля?

Наталля
Літоўская
Экспертка ў нерухомасці

Сітуацыя, калі людзям не да куплі жылля, зацягнулася. Традыцыйна ў снежні ў Менску фіксуюць усплёск колькасці продажаў кватэр – людзі хочуць сустрэць Новы год у новых сценах. У гэтым снежні такія здзелкі таксама былі, але, мяркуючы па папярэдніх дадзеных Нацыянальнага кадастравага агенцтва, колькасць не дацягнула да стандартнага «вялага» летняга месяца.

Аптымістычна настроеныя рыэлтары ўпэўнены: людзі чакаюць «добрых» цэнаў. Менш аптымістычна настроеныя лічаць, што людзі чакаюць вырашэння палітычнай сітуацыі.

Студзень 2021. Фота: АК / Белсат

Здаецца, менш аптымістычныя, яны бліжэй да рэальнасці. Менавіта таму прагназаваць, што будзе адбывацца на рынку, вельмі складана – ва ўраўненні суцэльныя зменныя: палітыка, узровень рэпрэсій, звязаны з імі адток кваліфікаваных (і плацёжаздольных) работнікаў. Хуткасць падзення рэальных даходаў грамадзян, здольнасць дзяржавы стрымліваць інфляцыю і не дапускаць рэзкай дэвальвацыі. Усе пераменныя ўплываюць на настрой беларусаў, іхнія зберажэнні і жаданне ўкладваць грошы ў дадатковыя метры. Так што можна толькі дакладна прапісаць, чаго не варта чакаць у новым годзе.

Рэзкага падзення коштаў

Так створаныя нашы прадаўцы –псіхалагічна ніколі не гатовыя да зніжэння. Сярэдні кошт прапановы кватэр у Менску цяпер – 1330 долараў за квадратны метр. З апошняга піка коштаў, зафіксаванага ў красавіку, прадаўцы скінулі ўсяго 150 долараў, у сярэднім па 20 долараў за месяц. У мінулыя крызісы хуткасць змяншэння складала 30-50 долараў за месяц. Хутчэй за ўсё, мы выйдзем на яе зноў. Рух да 1000 за квадратны метр кватэры ў старым жылым фондзе можа заняць ад 6 да 10 месяцаў.

Новая Баравая. 21 студзеня 2021 г. Фота: АК / Белсат

Аднаўленне крэдытавання

Банкі ў крызіс і пры пагрозе дэвальвацыі не хочуць пазычаць грошы на працяглыя тэрміны. Так што пра крэдытаванне другаснага рынку ў 2021-м можна не ўспамінаць. Складана прадказаць, колькі пратрымаецца крэдытаванне новабудоўляў па партнёрскіх праграмах. Малая верагоднасць, што ў канцы года яно яшчэ будзе.

Арэндных кватэр за «каммуналку»

Здымнае жыллё з пачаткам пандэміі патаннела ў сярэднім на 50-150 долараў. Попыт і так не быў высокім, а тут яшчэ за кошт «пасутачных» кватэр вырасла прапанова.

Студзень 2021. Фота: АК / Белсат

Калі скончыцца пандэмія і адкрыюцца межы, частка «пасутачных» кватэр вернецца на пасуточны рынак. Але да гэтага часу плацёжаздольнасць «працяглых» арандатараў не вырасце. Попыт – таксама. А вось дэвальвацыя можа «паспрыяць» зніжэнню арэндных ставак, традыцыйна прывязаных да долара. Але дакладна не да «камуналкі». Усё ж такі сталіца застаецца горадам з даходамі вышэйшымі, чымсьці ў сярэднім па краіне і самай нізкай забяспечанасцю жыхароў квадратнымі метрамі.

Новабудоўляў «па 500»

Цэны будуць зніжацца і на новабудоўлі, але па 500 не будуць прадавацца нават панэлькі з відам на МКАД. Проста таму, што сабекошт будаўніцтва ў камерцыйных забудоўшчыкаў вышэйшы. Ім даводзіцца плаціць за зямлю, за камунікацыі, адлічваць на інфраструктуру. У некаторых праектах (за выключэннем праектаў Даны Холдынгз) гэтыя выдаткі (а яны ўключаюцца ў сабекошт квадратнага метра) вышэйшыя за 300 долараў на метр, плюс скрынка дома – каля 500. Ёсць і камерцыйныя ЖК, у якіх сабекошт будаўніцтва скача ў раёне тысячы.

Цэннік «па 600-700» маглі б прапанаваць дзяржаўныя забудоўшчыкі, якія будуюць панэлькі на «халяўнай» зямлі. Але пакуль яны будуюць для ільготнікаў, прадаваць астатнім забаронена.

Па 700 можна чакаць прапаноў у Менск Міры – там ужо ад 770-ці, праўда, у дамах, якія толькі абяцаюць здаць у 2022 годзе. Як на цяперашнія часы прапанова – для тых, хто верыць Дана Холдынгз.

Беларусы ўпрыгожваюць свае балконы ў народныя колеры. Студзень 2021 году. Фота: АК / Белсат

Гарантый ад пераўтварэння ў даўгабуд

Дзяржава так і не змагла прыдумаць, як абараніць правы ўдзельнікаў долевага будаўніцтва або трымальнікаў жыллёвых аблігацый. У папярэднія крызісы даўгабудамі станавіліся і жылыя комплексы дзяржаўных забудоўшчыкаў, не кажучы ўжо пра камерцыйных. Не з’явяцца гарантыі і цяпер. У адрозненне ад даўгабудаў. Так што самым бяспечным варыянтам застаюцца альбо ўжо гатовыя кватэры, альбо новабудоўлі, у якіх прыступаюць да аздобных прац.

Наталля Літоўская/АА belsat.eu

Меркаванне аўтараў можа не супадаць з пазіцыяй рэдакцыі.

Больш матэрыялаў