«Надзявалі пакет на галаву, напаілі невядомай вадкасцю». Сталі вядомыя падрабязнасці затрымання і збіцця анархіста Рубашкі
Падчас правядзення ператрусу на кватэры, а таксама ў РУУС анархіста Яўгена Рубашку збівалі і катавалі, надзявалі пакет на галаву, патрабуючы доступу да яго тэлефону і камп’ютара. Пра гэта стала вядома ад сяброў і родных затрыманага.
Таксама з Яўгенам запісалі пакаяннае відэа, пасля чаго завезлі ў Следчы камітэт і адтуль на Акрэсціна, дзе папярэдне будуць утрымліваць 10 содняў.
Падчас ператрусу пацярпеў і ягоны сябра, якога таксама збівалі, надзявалі пакет на галаву, напаілі невядомай вадкасцю. Содні хлопец правёў на Акрэсціна, а ўчора суд Партызанскага раёну пакараў яго 14-дзённым арыштам быццам бы за непадпарадкаванне. Па словах сведкі з боку міліцыі, малады чалавек спрабаваў уцячы, калі яго прывезлі ў РУУС. Хаця на той момант ён знаходзіўся ў кайданках.
Нагадаем, што Яўгена вінавацяць у арганізацыі і рыхтаванні дзеянняў, якія груба парушаюць грамадскі парадак, а таксама ва ўдзеле ў іх (арт. 342 КК).
МГ belsat.eu
