Ужо напрыканцы 2023 года дэмакратычныя сілы Беларусі фармалізуюць сваю супрацу з ЗША. У дыялогу будуць удзельнічаць прадстаўнікі Каардынацыйнай рады і грамадзянскай супольнасці Беларусі, паведамляецца на афіцыйным сайце Святланы Ціханоўскай.
ЗША абвесцілі аб запуску стратэгічнага дыялогу з дэмакратычнай Беларуссю падчас візіту ў краіну Святланы Ціханоўскай. Па выніках беларускія дэмакратычныя сілы плануюць выпрацаваць стратэгію беларуска-амерыканскіх адносінаў і аднавіць усе кантакты, «якія былі разбураныя Лукашэнкам», гаворыцца на сайце абранай прэзідэнткі Беларусі.
У бліжэйшыя некалькі месяцаў ЗША прызначаць спецпасланніка для супрацы з дэмакратычнымі сіламі нашай краіны. Ён будзе галоўнай кантактнай асобай паміж дэмакратычнай Беларуссю і Вашынгтонам.
ЗША паабяцалі захаваць памер дапамогі Беларусі ў аб’ёме $30 мільёнаў. Гэтыя грошы пойдуць на падтрымку незалежных СМІ, праваабаронцаў, НДА і рэпрэсаваных.
У Кангрэсе пачалася праца над новым законам аб дэмакратыі, суверэнітэце і правах чалавека ў Беларусі. Гэты закон дапаможа зрабіць падтрымку ЗША больш сістэмнай і паслядоўнай.
Марыя Міхалевіч belsat.eu
