Заяву аб тым, што Беларусь ёсць наступнай мэтаю Уладзіміра Пуціна для аднаўлення СССР, зрабіў Уладзімір Зяленскі падчас інтэрв’ю паўднёвакарэйскаму выданню Chosun.
На пытанне карэспандэнта, што ёсць канчатковай мэтай Уладзіміра Пуціна, прэзідэнт Украіны адказаў, што гэта ўзнаўленне Савецкага Саюзу. «Гэта мэта ягонага жыцця», – падкрэсліў Уладзімір Зяленскі.
Ён таксама адзначыў, што паколькі дамагчыся гэтага дыпламатычным шляхам не ўдалося, Пуцін выкарыстаў усе віды пагрозаў, у тым ліку шантаж энергарэсурсамі. «Пасля ён вырашыў стаць адкрытым агрэсарам (праз уварванне ва Украіну). Яны [расейцы] забіваюць і катуюць бясконцую колькасць мірных жыхароў і нават пагражаюць ядравай катастрофай, акупуючы атамныя электрастанцыі», – падкрэсліў Зяленскі.
На думку ўкраінскага лідара, Уладзімір Пуцін хоча толькі таго, каб «уварвацца ва Украіну з дапамогай вайны і знішчыць украінскую нацыю. Наступная мэта Пуціна – Беларусь».
Адносна тактычнай ядравай зброі, якую Расея перадае ў Беларусь, Уладзімір Зяленскі адзначыў, што «гэта нічога не значыць для Украіны цяпер». Украіна больш не баіцца пагрозаў і захадаў Расеі, звязаных з ядравай зброяй, таму што такія пагрозы зыходзілі ад Расеі ўжо шмат разоў.
Уладзімір Зяленскі адзначыў, што перакідванне тактычнай ядравай зброі ў Беларусь таксама не больш як «палітычная хітрасць» для пагрозы Украіне і Еўропе. Палітычны шантаж з прымяненнем ядравай зброі – «амаль адзінае выйсце», якое засталося ў Крамля, на думку ўкраінскага лідара.
Раман Шавель belsat.eu
