На Нацыянальным прававым інтэрнэт-партале з’явілася пастанова, якой прыпыняецца ўдзел Беларусі ў Еўрапейскай культурнай канвенцыі.
Пастанову № 822 ад 28 лістапада 2023 года падпісаў прэм’ер-міністр Беларусі Раман Галоўчанка.
У дакуменце адзначаецца, што такое рашэнне прынятае Саветам Міністраў краіны на падставе артыкулу 44 Закону Рэспублікі Беларусь ад 23 ліпеня 2008 года «Аб міжнародных дамовах Рэспублікі Беларусь».
У самой пастанове адзначаецца неабходнасць «прыпыніць дзеянне Еўрапейскай культурнай канвенцыі, прынятай Радай Еўропы ў горадзе Парыжы 19 снежня 1954 года».
Пастанова ўступіла ў сілу з дня яе прыняцця: 28 лістапада 2023 года.
Задача Еўрапейскай культурнай канвенцыі – развіваць паразуменне паміж народамі Еўропы і ўзаемную павагу іх культурнай разнастайнасці, захоўваць еўрапейскую культуру, спрыяць нацыянальным укладам у агульную культурную спадчыну Еўропы пры павазе да агульных асноўных каштоўнасцяў, а таксама заахвочваць да вывучэння моваў, гісторыі і цывілізацыі краінаў, якія падпісалі гэтую канвенцыю.
Раман Шавель belsat.eu
