28 красавіка Аляксандр Лукашэнка наведаў Веткаўскі раён, што на Гомельшчыне. Гэта была рабочая «чарнобыльская паездка» ў змененым фармаце, як паведаміла прэс-служба беларускага кіраўніка. Сярод іншага, беларускі кіраўнік шмат казаў пра мір. Пра што яшчэ гаварыў Лукашэнка падчас свай паездкі? Сабралі асноўныя тэмы.
Падчас наведвання Гомельскай вобласці Аляксандр Лукашэнка закранаў розныя пытанні – пачынаючы ад пасяўной, развіцця асобных раёнаў і эканомікі рэгіёна і заканчваючы глабальнымі пытаннямі вайны і міру ў нашай краіне і ў свеце.
Першае, на што звярнуў сваю ўвагу Лукашэнка па прылёце ў Веткаўскі раён, – пытанне ўкамплектаванасці малочна-таварных комплексаў, а таксама працэс меліярацыі. На яго думку, апошняя ідзе вельмі павольна, таму павінна быць «жалезная дысцыпліна», бо гэта «залатыя землі».
«Наступае жалезная дыктатура», – так заявіў палітык, звяртаючыся да чыноўнікаў з нагоды дысцыпліны ў рэгіёнах. Бо, паводле ягоных словаў, адбыўся «поўны адрыў ураду ад губернатараў, заседзеліся ў Менску». Павінна быць кадравая дысцыпліна, а безгаспадарлівасць і расхлябанасць не павінны заставацца беспакаранымі, «калі мы не хочам ваяваць так, як яны [па ўсім відаць, гаворка вядзецца пра ўкраінцаў. – Заўв. «Белсат»] ваююць на поўдні».
Словы «пачэснае месца» Аляксандр Лукашэнка вымавіў па-беларуску, выступаючы на нарадзе з актывам Гомельскай вобласці. Ён заклікаў не шукаць «аб’ектыўных прычын» пэўным упушчэнням у працы.
«Галоўнае – на надумайце шукаць аб’ектыўныя прычыны. Не надумайце! Няма аб’ектыўных прычын. Нікому сёння не лёгка. Але калі мы вытрымаем, мы будзем зусім іншымі і зоймем сваё «пачэснае месца» ў гэтым свеце», – падкрэсліў Лукашэнка.
Таксама беларускі кіраўнік заклікаў чыноўнікаў забыць пра санкцыі, «не спаць, варушыцца і не скоўваць людзей». «Можа старшыня гар-, райвыканкама нешта недзе там праштурхнуць, прадаць – няхай вязе, прадае. Кантралюй толькі цэнаўтварэнне, каб да рук не прыліпала», – сказаў Лукашэнка.
Таксама беларускі кіраўнік заклікаў чыноўнікаў, асабліва аграрыяў, радавацца санкцыям. Бо дзякуючы гэтаму можна выкарыстоўваць новыя магчымасці, якія адкрыліся ў сувязі з іх увядзеннем. А таксама ён пахваліў губернатара Гомельскай вобласці і ўпаўнаважаных па рэгіёне, што яны ў сваіх выступленнях тэмы санкцыяў не закраналі.
Падчас выступлення Аляксандр Лукашэнка зазначыў, што Гомельская вобласць яму як родная і што менавіта яна яго «заўсёды падтрымлівала больш, чым якая іншая». Але з-за «бескантрольнасці і ныцця «ах, чарнобыльцы, ах чарнобыльцы» мы расслабіліся і не прыкмецілі, як пачалі губляць гэтую вобласць». Бо ў ёй сярод працавітых людзей з’явіліся «дзяльцы, жулікі і злодзеі». Таму гэты працэс трэба спыніць, для чаго на Гомельшчыну і быў накіраваны новы губернатар (21 снежня 2021 года старшынёй Гомельскага аблвыканкаму прызначаны Іван Крупко).
Таксама беларускі кіраўнік адзначыў, што толькі за 2022 год у пацярпелыя ад аварыі на Чарнобыльскай АЭС раёны было ўкладзена больш за 600 мільёнаў беларускіх рублёў.
Але пры гэтым на нарадзе прагучала, што, нягледзячы на заклікі Лукашэнкі «даць эканоміку», чыноўнікі недапрацоўваюць: так, 45% дарог рэгіёну маюць дэфекты пакрыцца, ёсць нараканні да працы службаў ЖКГ, да стану аўтобуснага парку і гарадскога транспарту і іншыя.
Бадай адной з найбольш яскравых падчас сённяшняй паездкі стала тэма міру. Лукашэнка шмат разоў звяртаў увагу на тое, што беларусы хочуць міру: «Хачу падкрэсліць: мы – мірныя людзі, і чужой зямлі нам не трэба», – сказаў ён.
Лукашэнка адзначыў, што забеспячэнне міру і бяспекі – гэта справа яго і сілавога блоку. «Ваша задача, – звярнуўся ён да чыноўнікаў, – стварэнне годных умоваў для жыцця людзей. Ваша задача – эканоміка».
Тэма міру гучала і падчас сустрэчы беларускага кіраўніка з жыхарамі Веткі. Калі людзі казалі яму пра сваё жаданне жыць у міры, ён ім адказваў, што таксама не хоча вайны. З ягоных словаў, яго заўсёды дзівіць, калі пачынаюць размаўляць пра вайну.
«Там людзі напружаныя ў Гомлі. Так, Гомельская вобласць і Берасцейская сталі прыфрантавымі. Але гэта не значыць, што да нас нехта збіраецца з вайной ісці. Шальных там хапае, але куды дзенешся… Вайна там ідзе. Таму вы не думайце, што я хачу разгарнуць тут нейкую вайну, – адзначыў Лукашэнка і дадаў. – Будзе вам мір, не хвалюйцеся».
«Усякае можа быць. Але я больш вас разумею, каб мы не ўцягнуліся ў гэтую шырокамаштабную бойню. Вопыт яе мы выкарыстоўваем, вывучаем. Глядзім, каб наша армія была мацнейшай. Таму вы не хвалюйцеся. Я больш за вас не хачу ваяваць. У мяне таксама ёсць дзеці. І вы ўсе мае дзеці. Я не хачу, каб мне давялося вас пасылаць кудысьці на фронт, – сказаў Аляксандр Лукашэнка. – Таму супакойцеся, працуйце спакойна. Ніхто на нас нападаць не збіраецца. У тым ліку ўкраінцы. Ды і заходнікі, з якімі я сустракаюся, яны мне кажуць: «Аляксандр Рыгоравіч, спадар прэзідэнт, да вас ні ўкраінцы, ні палякі не збіраюцца». Можа, і не збіраюцца. Але нам трэба быць гатовымі да ўсяго», – падкрэсліў у сваім звароце да веткаўчан Аляксандр Лукашэнка.
Раман Шавель belsat.eu