Стан жахлівы. Сябар згвалтаванай у Варшаве беларускі апавёў пра несуцяшальныя прагнозы лекараў
Хлопец згвалтаванай у цэнтры Варшавы беларускі паведаміў, што стан дзяўчыны не паляпшаецца, а лекары даюць несуцяшальныя прагнозы. «Усе дактары кажуць, што сітуацыя вельмі складаная», – цытуе Данілу «Радыё Свабода».
Як кажа сябар беларускай грамадзянкі, апошнія звесткі ад лекараў «вельмі жахлівыя», стан яе не палепшыўся.
«На сёння мне ўсе дактары кажуць, што сітуацыя вельмі складаная. Я маю надзею, што будзе прарыў у стане яе здароўя. Але лекары гавораць толькі нядобрае», – прызнаецца Даніла.
Ён шукаў у Польшчы беларускіх ці ўкраінскіх лекараў для дапамогі, але ў варшаўскім шпіталі яму паведамілі, што старонніх медыкаў туды не пусцяць. Тады хлопец папрасіў у больніцы выпіску, каб кансультавацца з іншымі адмыслоўцамі.
«Я вельмі ўдзячны ўсім людзям, хто дапамагае ў зборы грошай. Дай Бог, каб Ліза пайшла на папраўку, каб гэтыя грошы ёй спатрэбіліся на рэабілітацыю», – дадаў хлопец.
Напярэдадні ён пачаў дабрачынны збор, людзі ахвяравалі ўжо 300 тысячаў злотых (у пераліку 75 тысячаў долараў).
Беларуска стала ахвяраю злачынцы раніцай 25 лютага. Яе ў непрытомным стане і без вопраткі знайшлі ў пад’ездзе дому ў цэнтры Варшавы. Польскія медыі пісалі, што ў дзяўчыны спынялася сэрца, медыкам удалося яе рэанімаваць.
Паліцыя затрымала падазраванага, які пагражаў дзяўчыне нажом, згвалтаваў яе і спрабаваў задушыць. 23-гадоваму паляку выставілі абвінавачванні, яму пагражае пажыццёвае зняволенне.
Сёння суд арыштаваў яго на тры месяцы. Паводле звестак RMF FM, хлопец прызнаў віну.
Сцяпан Кубік belsat.eu
