Расейскі тэлеграм-канал «ЧВК-ОГПУ» ўвечары 26 чэрвеня паведаміў, што калона ПВК Вагнэра ўжо зайшла на тэрыторыю Беларусі. Пацверджання гэтай інфармацыі ў іншых крыніцах пакуль няма.
Паведамленне аб прыбыцці байцоў ПВК Вагнэра ў Беларусь з’явілася ў тэлеграм-канале адным сказам, без нейкіх дэталяў, у 22:09 26 чэрвеня.
Тэлеграм-канал «ЧВК-ОГПУ» і звязаны з ім сайт пазіцыянуюць сябе як расследавальнікаў таямніцаў чыноўнікаў, алігархаў, сілавікоў.
23 чэрвеня заснавальнік ПВК Вагнэра Яўгеній Прыгожын абвесціў, што хоча «аднавіць справядлівасць па ўсёй Расеі». Падраздзяленні наймітаў блакавалі Растоў і накіраваліся на Маскву. Аднак увечары 24 чэрвеня Прыгожын заявіў, што разварочвае калоны – яны вяртаюцца на свае палявыя пазіцыі. Стала вядома таксама, што нібыта Лукашэнка падчас тэлефоннай размовы ўгаварыў Прыгожына спыніць мяцеж.
У той жа вечар з’явілася інфармацыя, што крымінальная справа супраць Прыгожына за ўзброены мяцеж будзе закрытая, а сам ён паедзе ў Беларусь.
У панядзелак 26 чэрвеня Пуцін у сваім вечаровым звароце заявіў, што дазволіць усім ахвочым удзельнікам мяцяжу пакінуць Расею.
«Хто хоча, можа сысці ў Беларусь», – сказаў Пуцін.
Таксама 26 чэрвеня расейскае выданне «Вёрстка» са спасылкай на крыніцу ў лясніцтве паведаміла, што ў Беларусі пад Асіповічамі ўжо пачалі будаваць вайсковыя лагеры для размяшчэння байцоў ПВК Вагнэра.
Марыя Міхалевіч belsat.eu
