Еўрапейскі Звяз прапанаваў увесці супраць Беларусі новы пакет маштабных санкцыяў за яе ролю ў падтрымцы ўварвання Расеі ва Украіну, паведамляе Bloomberg.
Прапанаваныя меры прывядуць санкцыі супраць Беларусі ў адпаведнасць з многімі санкцыйнымі пакетамі, якія ЕЗ раней наклаў на Расею, уключаючы абмежаванні на ключавыя тэхналогіі і энергетычны сектар краіны. Яны патрабуюць падтрымкі ўсіх дзяржаў-членаў ЕЗ.
Да прапанаваных мераў адносяцца:
- экспартныя забароны на тавары і тэхналогіі падвойнага прызначэння, якія выкарыстоўваюцца ў ваенных мэтах і якія могуць павысіць прамысловы патэнцыял краіны;
- санкцыі ў дачыненні да нафты, вугалю, металапрадукцыі і золата;
- гандлёвыя абмежаванні на прадметы раскошы, інвестыцыі і аказанне пэўных паслуг;
- мерапрыемствы, якія ўдараць па авіяцыйным і энергетычным сектарах краіны і ключавых крыніцах даходаў.
Падобна да санкцый, уведзеных супраць Расеі, прапановы ўтрымліваюць выключэнні для лекавых сродкаў, сельскагаспадарчай і харчовай прадукцыі.
Таксама Еўразвяз працуе над дзясятым пакетам санкцый, накіраваным супраць Расеі, а таксама цэнавым абмежаваннем на расейскія нафтапрадукты. Абодва дакументы хочуць прыняць да пачатку нафтавага эмбарга на наступным тыдні.
Алена Рувіна belsat.eu
