Сейм Літвы прыняў папраўкі ў закон аб прававым статусе іншаземцаў. Згодна з ім іншаземцы, якія прыбылі на тэрыторыю Літвы з гуманітарнай візаю пры пасярэдніцтве МЗС, будуць атрымліваць ВНЖ тэрмінам да трох гадоў. Да гэтага беларусам неабходна было працягваць ВНЖ штогод.
Такім чынам, Сейм рэспублікі падтрымаў прапанову міністаркі ўнутраных справаў Агне Білатайце, з якой яна выступіла ў канцы верасня. У снежні гэтую прапанову ухваліў камітэт у міжнародных пытаннях літоўскага Сейму.
«Гэтая папраўка важная для больш як 750 беларускіх грамадзянаў, што ўцяклі ў Літву ад рэпрэсіўнага рэжыму Лукашэнкі, якім на гэтай падставе неабходна штогод працягваць від на жыхарства, і сітуацыя ў Беларусі не змянілася», – падкрэсліў старшыня камітэту ў замежных справах і старшыня групы «За дэмакратычную Беларусь» Жыгімантас Павілёніс.
Пры гэтым Агне Білатайце выступае за тое, каб на ўзроўні Сейму было прынятае рашэнне аб уніфікацыі абмежавальных захадаў для грамадзянаў Расеі і Беларусі. Яна падкрэсліла, што гэта звязана з пытаннямі бяспекі.
Раман Шавель belsat.eu
