Днямі ў Літве прадставяць праект павелічэння тэрміну дзеяння пашпарта замежніка
Бліжэйшымі днямі Міністэрства ўнутраных справаў Літвы ўнясе ў Сейм законапраект аб павелічэнні тэрміну дзеяння пашпарта іншаземца, які выдаецца ў краіне. Пра гэта заявіла кіраўніца МУС Агне Білатайце ў інтэрв’ю «BNS». Раней тэрмін дзеяння такога пашпарта хацелі павялічыць да трох гадоў.
«У бліжэйшы час мая прапанова да Закону аб прававым становішчы замежнікаў будзе зарэгістраваная альбо мной, альбо супольна з маімі калегамі. І будуць прапановы падоўжыць тэрмін дзеяння пашпарта замежніка. Вядома, гаворка ідзе не пра ўсіх, а пра выбраных асобаў, якія сапраўды пераследуюцца і дакладна не могуць вярнуцца ў Беларусь», – сказала Агне Білатайце.
Цяпер пашпарты іншаземца ў Літве выдаюцца на год, аднак раней сцвярджалася, што тэрмін іх дзеяння могуць павялічыць да трох гадоў. Зарэгістраваць гэтую папраўку ў Сейм плануецца днямі.
Аднак пакуль не зразумела, ці будзе праект нешта мяняць ва ўмовах выдачы пашпарта замежніка.
«Пазіцыя Міністэрства ўнутраных справаў такая, што пашпарты іншаземцаў павінны выдавацца асобам, якія пацярпелі або зазнаюць пераслед з боку рэжыму. Для таго, каб гэты працэс працаваў, павінен быць механізм, у якім удзельнічалі б і Міністэрства замежных справаў, і Дэпартамент дзяржбяспекі», – адзначыла міністарка замежных справаў Літвы.
Таксама раней у літоўскім Дэпартаменце міграцыі заявілі, што беларусы, якія ўцякалі ад рэжыму Лукашэнкі, змогуць атрымліваць пашпарты замежнікаў. Але, паводле іх, гэта датычыць толькі тых, хто не можа вярнуцца ў Беларусь з палітычных ці гуманітарных прычынаў.
Таксама Народныя амбасады Беларусі пры ўдзеле Офісу Святланы Ціханоўскай і Аб’яднанага пераходнага кабінету стварылі сайт pashpart.org, на якім можна знайсці падрабязныя інструкцыі аб парадку атрымання праязнога дакументу замежніка са спасылкамі на законы 29 краінаў, у якіх існуе такая магчымасць.
Алена Рувіна belsat.eu
