Пракуроры ўбачылі ў сацсетках фота квітка з крамы і распачалі правяранне за рост коштаў
Пракуратура Віцебскай вобласці ініцыявала правяранне ў краме ў справе парушэнняў правілаў коштаўтварэння на падставе фотаздымка, які апублікавалі карыстальнікі ў сацсетках. Пра гэта паведамляе прэсавая служба ведамства.
Пракуратура Віцебскай вобласці зладзіла маніторынг публікацыяў у сеціве і заяўляе, што выявіла парушэнне заканадаўства. У адной з сацсетак пракуроры выявілі фотаздымак квітка з крамы з коштамі. Пад фота былі каментары з «негатыўнаю ацэнкай дзейнасці дзяржаўных органаў, чым стваралася сацыяльная напружанасць».
У выніку пракуратура Віцебскай вобласці накіравала даручэнне начальніку галоўнага ўпраўлення і гандлю Віцебскага аблвыканкаму з патрабаваннем праверыць гэтую публікацыю. Пракуроры патрабуюць таксама пакараць вінаватых, калі факт пацвердзіцца.
Алена Аляксандрава belsat.eu
