Еўрапейская служба замежнапалітычнай дзейнасці (ЕСЗД), што кіруе вонкавай палітыкай Еўрапейскага Звязу, павіншавала беларусаў з Днём Волі. Адпаведны каментар ЕСЗД быў апублікаваны 25 сакавіка ў сацсетцы X.
«Сёння мы разам з беларусамі святкуем Дзень Волі. Мы падтрымліваем іхнае імкненне да вольнай, дэмакратычнай, суверэннай і незалежнай Беларусі як часткі мірнай Еўропы», – заявілі ў ведамстве.
Там таксама адзначылі, што Еўразвяз падтрымлівае народ Беларусі.
Абраная прэзідэнтка Беларусі Святлана Ціханоўская адзначыла, што беларусы здолеюць пабудаваць краіну, пра якую мараць.
«Хтосьці скажа, што я вяду размову пра нейкую далёкую будучыню. І калі гэта спраўдзіцца – і ці спраўдзіцца ўвогуле, – невядома. Але пакуль мы разам і не апускаем рук, мы крочым да сваёй перамогі», – сказала яна ў святочным звароце.
А старшыня Рады Беларускай Народнай Рэспублікі Івонка Сурвіла заклікала беларусаў праяўляць салідарнасць, шанаваць незалежнасць сваёй краіны і прадэманстраваць свету, што беларусы не падтрымліваюць палітыкі агрэсіі супраць іншых краінаў, якую праводзіць рэжым Лукашэнкі.
Якуб Хруст belsat.eu
