У Беларусі вядзецца актыўная праца дзеля мінімізацыі наступстваў санкцыйнага ціску, пераарыентацыі экспарту, а таксама крокі ў адказ на санкцыі, заявіў міністр замежных справаў Сяргей Алейнік у эфіры тэлеканалу «Беларусь 1», піша Reform.by.
Паводле Алейніка, ужо прыняты шэраг рашэнняў, а менавіта: вызначаны пералік несяброўскіх краінаў, задзеяныя абмежаванні ў тэхналагічным імпарце для заходніх краінаў і для шэрагу харчовых тавараў.
«На гэтым тыдні было прынятае рашэнне аб абмежаванні ўезду польскіх прычэпаў і паўпрычэпаў на тэрыторыю Беларусі – гэта якраз захада ў адказ на апошнія санкцыйныя рашэнні Варшавы ў дачыненні Рэспублікі Беларусь. Рыхтуюцца дадатковыя захады, пра якія мы хутка даведаемся», – сказаў міністр.
Паводле Алейніка, Беларусь прымае гэтыя рашэнні «вельмі ўдумліва, найперш ацэньваючы эканамічныя рызыкі і эканамічны эфект» і «страляць сабе ў нагу» не збіраецца.
«Мы абсалютна не зацікаўленыя гэтымі рашэннямі страляць сабе ў нагу, так, як гэта робяць заходнія краіны. Таму мы выдатна разумеем, што ўсе беспрэцэдэнтныя санкцыі Захаду не толькі адбіваюцца на тых краінах, у дачыненні якіх яны прымаюць гэтыя санкцыі, <…>, але і бумерангам б’юць па саміх аўтарах гэтых санкцыяў», – заявіў чыноўнік.
Марыя Міхалевіч belsat.eu
