На Добрускую папяровую фабрыку 29 кастрычніка мусіць прыехаць Аляксандр Лукашэнка. За тыдзень да візіту пачаліся звальненні працаўнікоў, якіх затрымлівалі за ўдзел у мітынгах улетку і ўвосень 2020 году, піша «Радыё Свабода» са спасылкай на ўласныя крыніцы на фабрыцы.
Складзены спіс з 70 «нелаяльных» працаўнікоў, якія будуць звольненыя.
«Некаторых звальняюць сем’ямі! Спачатку прапануюць напісаць заяву па ўласным жаданні. Калі хто ня згодны – забіраюць пасля змены з прахадной на трое і больш сутак у ізалятар часовага ўтрымання. І потым звальняюць, – перадае «Радыё Свабода» аповед аднаго з працаўнікоў. – Ужо аднаго з нашых паказвалі пасля затрымання па прапагандысцкіх telegram-каналах. Кіраўнікі настолькі згубілі прыстойнасць, што ў вочы кажуць: «Так, гэта рэпрэсіі і пераслед«. Людзі баяцца».
Паралельна на фабрыцы складаецца яшчэ адзін спіс – тых, хто будзе прысутнічаць на сустрэчы з Лукашэнкам. Для іх адмыслова шыюць новыя робы.
«Гэта спіс тых, хто будзе ўдзельнічаць у сустрэчы. Паглядзіце сваіх людзей і тэрмінова напішыце імя, імя па бацьку і прозвішча, рост і памер для робы, бо заўтра для нас запускаюць швейны цэх», – з такім паведамленнем звярнулася кіраўніцтва фабрыкі да працаўнікоў у групе ў Viber.
ГГ, belsat.eu