У Вільні ўпершыню ўручылі медалі ордэну Пагоня. Цырымонія адбылася ў сядзібе Таварыства беларускай культуры. Узнагароду атрымалі блізкія палітычных вязняў Эдуарда Пальчыса, Ігара і Дар’і Лосікаў, паведамляе Рада БНР у сваім Telegram-канале.
Блізкія палітычных вязняў Эдуарда Пальчыса, Ігара і Дар’і Лосікаў атрымалі медалі ордэну Пагоня. Першая цырымонія ўручэння ўзнагароды адбылася ў сядзібе Таварыства беларускай культуры ў Вільні.
Сябра камісіі ў справе ўзнагароджання пры Радзе БНР Алесь Чайчыц заявіў, што палітвязні цяпер праходзяць праз цяжкія выпрабаванні:
«Дар’я, Ігар і Эдуард праходзяць праз цяжкія выпрабаванні за праўду, за вернасць сваім ідэалам і за ўвесь беларускі народ. Яны дэманструюць годнасць і гераізм у найскладанейшых умовах, якія ім незаконна стварылі злачынцы ды ворагі дэмакратыі і свабоды. Уся Беларусь чакае іхнага найхутчэйшага вызвалення».
Эдуард Пальчыс, Ігар і Дар’я Лосікі былі ўзнагароджаныя дэкрэтам старшыні Рады БНР ад 25 сакавіка 2023 года за заслугі на ніве барацьбы за волю Беларусі.
Пра заснаванне ордэну Пагоня Рада БНР абвесціла ў леташнім лістападзе. Ім адзначаюць выбітныя заслугі перад Беларуссю і беларускім народам.
«Медаль уручаецца асобам, якія адзначыліся на ніве змагання за волю і незалежнасць Беларусі; выбітным грамадскім і культурніцкім дзеячам у Беларусі і сярод беларускага замежжа; замежнікам, якія спрычыніліся да даследаванняў і папулярызацыі Беларусі ў свеце, а таксама іншым чынам спрыялі нацыянальным інтарэсам Беларусі», – адзначалася ў паведамленні.
Сяргей Крот belsat.eu