Следам за 13-м пакетам санкцыяў Еўразвязу новыя санкцыі супраць Расеі анансаваў 23 лютага прэзідэнт Злучаных Штатаў. Поўны спіс санкцыяў пакуль не апублікаваны, але Джо Байдэн раскрыў некаторыя дэталі.
Абноўлена. Апублікаваны поўны спіс санкцыяў.
Прэзідэнт ЗША Джо Байдэн казаў аб адказнасці Уладзіміра Пуціна за вайну ва Украіне і смерць зняволенага апазіцыйнага лідара Аляксея Навальнага:
«Дзесяць гадоў таму Пуцін акупаваў Крым і стварыў марыянетачныя рэжымы ў Луганскай і Данецкай абласцях Украіны. Два гады таму ён спрабаваў сцерці Украіну з мапы свету. Калі Пуцін не заплаціць цану за ўчыненыя ім смерць і разбурэнне, ён будзе ісці далей. І выдаткі для Злучаных Штатаў — а таксама для нашых саюзнікаў у NATO і партнёрамі ў Еўропе і ва ўсім свеце — будуць расці».
Новых санкцыяў будзе больш за 500, расказаў Байдэн. Яны будуць скіраваныя на асобаў, звязаных са зняволеннем Навальнага, а таксама на расейскі фінансавы сектар, вайсковую індустрыю, сеткі закупак і абыходу ўжо ўведзеных санкцыяў. Экспартныя абмежаванні ўвядуць супраць амаль сотні суб’ектаў, якія таемна падтрымліваюць расейскую ваенную машыну. Таксама будуць прынятыя захады для скарачэння энергетычных даходаў Расеі.
Акрамя таго, Байдэн расказаў, што загадаў узмацніць падтрыманне грамадзянскай супольнасці, незалежных СМІ і тых, хто змагаецца за дэмакратыю ва ўсім свеце.
Байдэн таксама заклікаў Палату прадстаўнікоў ЗША ўхваліць дадатковы законапраект аб нацыянальнай бяспецы з тэрміновым фінансаваннем Украіны. Чарговы пакет дапамогі Украіне не могуць ухваліць з мінулага лістапада праз нязгоду чальцоў Рэспубліканскай партыі ў Кангрэсе ЗША. Тры дні таму Байдэн наўпрост звязаў страту Аўдзееўкі з адсутнасцю дапамогі Украіне.
Алесь Наваборскі belsat.eu