У вядомага беларускага тэнісіста, былой першай ракеткі свету ў парным разрадзе, дзесяціразовага ўладальніка тытулаў «Вялікага шлема», алімпійскага чэмпіёна Максіма Мірнага дыягнаставалі злаякасную пухліну. Пра гэта паведамляе Smartpress.by са спасылкай на свае крыніцы.
Спартовец звярнуўся да лекараў са скаргамі на галаўныя болі крыху больш як месяц таму. Праведзенае МРТ пацвердзіла несуцяшальны дыягназ.
Тэнісісту правялі трэпанацыю чэрапа і выдалілі пухліну ў адной з менскіх больніцаў. Аперацыя доўжылася 8 гадзінаў і прайшла вельмі паспяхова. Максім Мірны добра перанёс аперацыю і пасля з’ехаў з Беларусі для працягу лячэння.
У канцы кастрычніка спартовец адмовіўся ад сваёй заявы, зробленай у жніўні 2020 года, калі ён асудзіў гвалт супраць мірных дэманстрантаў. Ягоныя словы апублікавала Федэрацыя тэніса Беларусі.
Мірны вярнуўся ў краіну і заявіў, што шкадуе пра сваю пазіцыю ў 2020 годзе. Тэнісіст спаслаўся на тое, што падчас пандэміі ў яго памерлі двое сваякоў – сястра бацькі і сястра маці. Гэтую трагедыю ён цяжка перажываў, а потым «здарыліся нашыя выбары 2020 года».
Якуб Хруст belsat.eu