21 сакавіка Аляксандр Лукашэнка зноў збірае сустрэчу з сілавікамі. Як піша «Пул Первого», «у цэнтры ўвагі – як вонкавыя, так і ўнутраныя пагрозы». У тым ліку «гаворка пойдзе і аб адной нядаўняй гучнай аперацыі спецслужбаў».
Якая аперацыя будзе абмяркоўвацца, не ўдакладняецца, але «Наша Ніва» мяркуе, што вядзецца пра забойства 19 сакавіка сіламі КДБ замежніка ў Горадні.
Паводле выдання, акурат гэтае пытанне Лукашэнка абмяркоўваў 20 сакавіка і са сваім сынам Віктарам, які ўзначальвае міжведамасную Раду спецыяльных падраздзяленняў.
«Наша Ніва» піша, што ў Горадні «Альфа» магла забіць грамадзяніна адной з дзяржаваў Еўрапейскага Звязу. Пры гэтым інфармацыя, што гэты грамадзянін нібыта адбіваўся ад КДБ гранатамі, нашымі суразмоўцамі ставіцца пад сумнеў. Таксама нічога невядома пра страты з боку КДБ.
Між тым з 19 сакавіка сілавікі з аўтаматамі ў пункце пропуску «Казловічы» на беларуска-польскай мяжы ладзілі правяранне кожнага, хто заехаў у пункт пропуску.
«Падстаў і прычын праверак не назвалі. Стрэсуюць і супрацоўнікі пункту пропуску, якія працуюць разам з КДБ», – піша Hrodna.life.
Пра інцыдэнт у Горадні спачатку паведамілі незалежныя тэлеграм-каналы. Паведамлялася пра стрэлы, выбух і затрыманне. Затым з заяваю выступіў КДБ Беларусі, які паведаміў, што ў Горадні быў замежны грамадзянін, грамадзянства якога не называецца. Ён нібыта аказаў супраціў, страляў і ўзрываў гранаты. Афіцыйна ніхто іншы ў інцыдэнце не пацярпеў.
Таксама паведамлялася пра сілавікоў і сапёраў каля дому старшыні Гарадзенскага аблвыканкаму Уладзіміра Караніка.
Якуб Хруст belsat.eu