20 верасня ў Швейцарыі працягнуўся суд над былым байцом СОБРу Юрыем Гараўскім, датычным да справы са знікненнем і забойствам вядомых палітыкаў Беларусі ў канцы 1990-х гадоў. Пасяджэнне закончылася, чакаецца вынясенне прысуду, перадае выданне «Новы час», якое сочыць за хадою працэсу.
Сёння ў Швейцарыі адбылося аднаўленне судовага працэсу над былым беларускім спецназаўцам, і да таго, як даць Юрыю Гараўскаму апошняе слова, у судзе выступіла адвакатка абвінавачанага, якая заявіла аб невінаватасці свайго падабароннага. Яна, у прыватнасці, адзначыла, што Гараўскі «ўсяго толькі быў салдатам, які выконваў загад», але пры гэтым яна прызнала, што ён удзельнічаў у выкраданні апазіцыйных палітыкаў.
Таксама перад судом выступіў пракурор Пэтэр Гангартнэр (Peter Hangartner), які паўтарыў свае ўчорашнія словы аб вінаватасці Гараўскага, а пазней слова ўзяў прадстаўнік Алены Захаранкі і Валерыі Красоўскай Севярын Вальц.
Паводле Вальца, Гараўскі вінаваты ў гвалтоўных знікненнях беларускіх палітыкаў. Севярын Вальц таксама адзначыў, што тэрмін даўнасці ў гэтай справе не прайшоў, бо ў 2001 годзе сталі вядомыя ўрыўкі інфармацыі, чуткі, а кейс Гараўскага разглядаецца тут і цяпер.
Затым з апошнім словам выступіў сам Юрый Гараўскі. У ім былы спецназавец звярнуўся да суддзі, блізкіх і сваякоў забітых.
«Паважаны суд, – звярнуўся Гараўскі да суддзі, – вы зараз будзеце прымаць рашэнне. Калі вы вынесеце суровае рашэнне, больш ніхто ў свеце не будзе паведамляць пра злачынствы ўлады. Я прашу прабачэння ў блізкіх і сваякоў загінулых, разлічваю на справядлівае пакаранне швейцарскага суда», – сказаў Гараўскі.
Пасля гэтага судовае пасяджэнне завяршылася. Суддзя паведаміў, што вердыкт будзе вынесены на наступным тыдні ў пісьмовай форме. Дзеля абвяшчэння прысуду не будзе склікацца асобнае пасяджэнне.
Таксама суддзя адзначыў, што матывацыйная частка з тлумачэннямі не будзе апублікаваная адразу. Як паведамілі «Новаму часу» юрысты-эксперты, гэта не тыповая практыкай для швейцарскага правасуддзя.
Нагадаем, што беларус Юрый Гараўскі абвінавачваецца ў датычнасці да знікненняў вядомых беларускіх палітыкаў. У 1999 годзе ў Беларусі зніклі былы міністр унутраных справаў Юрый Захаранка, экс-кіраўнік Цэнтрвыбаркаму Віктар Ганчар і бізнесовец Анатоль Красоўскі. Афіцыйнае расследаванне знікнення вынікаў не дало, праз дваццаць гадоў яго зусім спынілі.
Пракурор запытаў для Гараўскага тры гады пазбаўлення волі з адным годам рэальнага зняволення і двума гадамі ўмоўна.
Раман Шавель belsat.eu
