Першы беларускі ноўтбук «H-book» прадаецца ў 18 краінах свету, піша БелТА са спасылкай на словы генеральнага дырэктара ААТ «Кіруючая кампанія холдынгу «Гарызонт» Юрыя Прэдко.
Пра пачатак вытворчасці ноўтбукаў «Гарызонт» заявіў у снежні 2022 года.
«Сёння мы мадэрнізавалі і стварылі новую вытворчасць для масавага прадукту. Мы цяпер на канвееры рыхтуемся да запуску манаблокаў, а таксама мінікамп’ютараў, якія ўсталёўваюцца побач з экранам. Такім чынам, мы пашыраем лінейку, і ў другім паўгоддзі гэтая прадукцыя з’явіцца на прылаўках. Мы выпускаем практычна ўсю гаму ноўтбукаў. Нават у найбліжэйшы час прэзентуем рынку 13-е пакаленне працэсара», – распавёў Юрый Прэдко.
Паводле гендырэктара, экспарт беларускіх ноўтбукаў ідзе ў 18 краінаў. Асноўныя кірункі – Расея, Казахстан, Арменія.
«Мы выкарыстоўваем уласнае праграмнае забеспячэнне. А гэта і ёсць гарантыя бяспекі кіравання камп’ютарам дыстанцыйна. З гэтага гледзішча мы дастаткова сурʼёзна прасунуліся», – заявіў гендырэктар «Гарызонту».
Аляксандр Лукашэнка 1 верасня 2022 года паказаў «першы камп’ютар, створаны ў Беларусі», – ноўтбук нібыта ад заводу «Гарызонт», які вельмі нагадваў «Lenovo IdeaPad 3». Лукашэнка абяцаў, што да канца года ноўтбук будзе мець 30 % беларускіх дэталяў, але на той момант іх было толькі 12 %. Паведамлялася, што камп’ютар будзе каштаваць ад 1300 рублёў у залежнасці ад камплектацыі і што яго запусцяць у серыйную вытворчасць у лістападзе 2022 года.
22 снежня «гарызонтаўскі» ноўтбук пад брэндам «H-book» пачалі прадаваць у «Galleria Minsk», але продаж пратрываў толькі тры дні.
Марыя Міхалевіч belsat.eu