У сваім акаўнце ў Twitter Ілан Маск распачаў галасаванне з пытаннем, ці мусіць ён вызваліць месца кіраўніка сацыяльнай сеткі. І паабяцаў, што падпарадкуецца меркаванню большасці. Пакуль 56 % – за ягоную адстаўку.
Кіраўнік Twitter Ілан Маск надумаў спытаць у карыстальнікаў сацыяльнай сеткі, ці мусіць ён пакінуць сваю пасаду. Ён зладзіў апытанне і паабяцаў падпарадкавацца меркаванню большасці. На гэты момант у галасаванні ўзялі ўдзел больш за 13 мільёнаў карыстальнікаў, 56 % выступаюць за адстаўку Маска.
Такім жа чынам Маск раней вызначаў лёс акаўнту колішняга прэзідэнта ЗША Доналда Трампа. Большасць прагаласавала за ўзнаўленне ягонай старонкі, і гэта было зроблена.
Ілан Маск узначаліў Twitter напрыканцы кастрычніка. Ён звольніў каля паловы работнікаў, тым, хто застаўся, прапанаваў працаваць звыштэрмінова і нават перабудаваў некалькі памяшканняў у штаб-кватэры ў гатэльныя нумары.
Адной з самых рэзанансных прапановаў Маска на пасадзе кіраўніка Twitter сталася платная пазнака верыфікацыі, што праўда, ад гэтай ідэі ён адмовіўся.
Апошні скандал – блакаванне акаўнтаў журналістаў «The New York Times», «The Washington Post», CNN і «Mashable». Нагодаю сталіся публікацыі пра перасоўванне асабістага самалёта Маска. Неўзабаве старонкі вярнулі ўладальнікам.
Сяргей Крот belsat.eu