«Байрактары» паабяцалі перадаць бясплатна, дык украінцы выдаткавалі іх на пакупку ўжо запушчанага спадарожніка. Тым часам грошы на яшчэ адзін «Байрактар» збіраюць латышы.
Украінскі «Дабрачынны фонд Сяргея Прытулы» паведаміў 18 жніўня, што за кошт праекту «Народны Байрактар» купіў спадарожнік: кампанія ICEYE аддала Міністэрству абароны Украіны поўны доступ да ўсіх магчымасцяў спадарожніка, што ўжо знаходзіцца на арбіце, а таксама дала доступ да «сузор’я» спадарожнікаў з радарамі сінтэзаванай апаратуры (SAR).
«Сёння ICEYE мае самую перадавую тэхналогію радыёлакацыйнай спадарожнікавай здымкі, – заявіў заснавальнік фонду, вядоўца і валанцёр Сяргей Прытула. – Гэтае пагадненне з’яўляецца сур’ёзным крокам у забеспячэнні крытычных патрэбаў украінскага ўраду ў звестках сачэння і істотнай дапамогай нашым Збройным сілам».
Навіну фонд пачаў фразай: «Украінцы, вы – космас».
ICEYE пацвердзіла ўгоду: кантракт падпісаны з фондам і дасць украінскім уладам поўны доступ да аднаго са спадарожнікаў на арбіце, а таксама доступ да іншых 20 спадарожнікаў, каб ЗСУ «атрымлівалі радыёлакацыйныя спадарожнікавыя здымкі крытычных месцаў з высокай частатой паўторнага наведвання». Кампанія дадае, што ейныя спадарожнікі могуць атрымліваць выявы высокага разрознення не толькі днём, але і ноччу, і нават праз аблокі.
Фонд Прытулы раней сабраў 600 млн грыўняў (каля 20 млн долараў) за тры дні, гэтага хапіла б на тры, а то і чатыры беспілотнікі. Вытворца «Байрактараў», турэцкая кампанія «Baykar» адказала на збор абяцаннем аддаць тры дроны бясплатна. Да таго 5,9 млн еўраў на «Байрактар» для Украіны сабралі літоўцы, пасля – палякі і беларусы Польшчы сабралі 5 млн долараў на яшчэ адзін «Байрактар». І тым, і тым таксама паабяцалі аддаць беспілотнікі бясплатна.
Цяпер на яшчэ адзін «Байрактар» для Украіны пачалі збор грошай у Латвіі. На момант публікацыі сабралі каля 419,5 тысячы еўра з неабходных 5 млн.
«Bayraktar TB2» – турэцкі ўдарны беспілотнік сярэдняй вышыні палёту, што распрацоўваўся з 2007 года і ўпершыню падняўся ў неба ў 2014-м. Апарат можа кіравацца з далёкасці да 150 км і быць у паветры больш чым 24 гадзіны, можа несці дзве супрацьтанкавыя ракеты з лазернай наводкай або чатыры высокадакладныя авіябомбы. Такія беспілотнікі выкарыстоўвае як сама Турцыя, так і Украіна, Польшча, Азербайджан, Кыргызстан, Туркменістан, Катар, Марока, Пакістан ды іншыя.
Рэвалюцыйная асаблівасць «Байрактара» – параўнальна невысокая цана, бо аналагі каштуюць дзясяткі мільёнаў долараў. Эфектыўнасць «Байрактараў» на вайне ва Украіне ацэньваюць па-рознаму, адзначаюць іх уразлівасць адносна сістэмаў супрацьпаветранай абароны. Але «Байрактарамі» знішчылі ўжо нямала расейскай ваеннай тэхнікі, у тым ліку караблі, а беспілотнікі сталі ва Украіне мэмам, якому прысвячаюць песні.
Алесь Наваборскі belsat.eu