Абвясцілі пераможцаў літаратурнай прэміі Гедройця. У конкурсе бралі ўдзел кнігі, якія былі напісаныя на беларускай мове ў жанрах мастацкай і дакументальнай прозы і былі выдадзеныя ў 2021 годзе.
Першае месца «за ўваскрашэнне genius loci і расшыфроўку іерогліфаў на стэле беларускай сталіцы» заняла кніга Сяргея Абламейкі «Невядомы Менск. Гісторыя знікнення. Кніга першая» (Радыё Свабодная Эўропа/Радыё Свабода, 2021). «Гэтая кніга доктара гісторыі Сяргея Абламейкі – першае навуковае даследаванне пра час і прычыны разбурэння Старога гораду, яго загадкі, яго герояў і антыгерояў», – піша беларускі ПЭН-цэнтр.
Другое месца «за чароўнае запрашэнне чытача ў свет чалавечай годнасці, пералівістых думак і абэртонаў» атрымала Вольга Гапеева з кнігай «Самота, што жыла ў пакоі насупраць» (Менск, «Галіяфы», 2021).
Трэцяе месца – у кнігі «Жэнька, каралева мышак» Валерыя Гапеева (Менск, «Кнігазбор», 2021) «за стварэнне дзіцячага свету, поўнага дарослай мудрасці».
Усяго ў кароткі спіс увайшло шэсць кніг. Іншыя кнігі кароткага спісу:
Сёлета ў склад журы ўвайшлі: літаратуразнаўца Ульяна Верына; крытык, літаратар Сяргей Дубавец; пісьменніца Святлана Курс; паэт, перакладчык Андрэй Хадановіч; крытык, літаратуразнаўца Ціхан Чарнякевіч.
Прэмія Гедройця – незалежная літаратурная ўзнагарода, якая ўручаецца 11 год запар і адыгрывае значную ролю ў жыцці культурніцкай супольнасці Беларусі.
Алена Рувіна belsat.eu