Пасля выбуху на Крымскім мосце беларусы пачалі адмаўляцца ад паездак на акупаваны паўвостраў. Дый у турфірмах адгаворваюць ехаць туды. Кажуць, лепш у Краснадарскі край: там і бяспечна, і танней.
Сёння ўначы Крымскі мост быў атакаваны, паводле неафіцыйнай інфармацыі, надводнымі дронамі. У выніку адзін пралёт быў разбураны, другі – пашкоджаны. Аўтамабільны рух спынілі. Чыгуначная частка мосту не пацярпела, цягнікі ходзяць, аднак з затрыманнямі ў графіку.
У адной беларускай турфірме сказалі «Белсату», што, нягледзячы на здарэнне, аўтобусных тураў у Крым не касуюць.
«Мы выязджаем у Судак, Феадосію, Кактэбель. Ну, вось хутка будзем ведаць, як там будуць выезды цяпер, з мостам гэтым… Можа, лепш разглядзіце Анапу? Там чыстыя, пясчаныя, добрыя, вялікія пляжы. Пуцёўка на траіх будзе ўдвая таннейшая, чымся Крым».
У другой кампаніі распавялі, што пасля выбуху на мосце аўтобусы вязуць на паромах:
«У нас цяпер аўтобус там, ён пайшоў на пароме. На мост закрыта ўсё».
У гэтай фірме прызналіся, што сёння кліенты пачалі масава адмаўляцца ад аплачаных тураў у Крым:
«Там небяспечна. І ў Крыме даражэй. У нас цяпер шмат хто адмаўляецца. Лепш, натуральна, у Краснадарскі край. Калі б у мяне быў выбар, я б у Крым не паехала».
Сяргей Крот belsat.eu