Польскія спецслужбы затрымалі ўкраінца, якога вінавацяць у планаванні дыверсіяў на замову выведкі РФ
У Вроцлаве 31 студзеня быў затрыманы грамадзянін Украіны, якога вінавацяць у планаванні дыверсійнай дзейнасці на тэрыторыі Польшчы на замову расейскіх спецслужбаў. Украінца затрымалі працаўнікі Агенцтва ўнутранай бяспекі (ABW) Польшчы, піша infosecurity24.pl, спасылаючыся на прэс-рэліз ABW.
«Агенцтва ўнутранай бяспекі атрымала інфармацыю пра тое, што грамадзянін Украіны, які дзеяў ад імя расейскіх спецслужбаў, плануе ўчыніць на тэрыторыі Польшчы захады дзеля падпалу аб’ектаў у горадзе Вроцлаве, якія месцяцца ў непасрэднай блізкасці ад элементаў інфраструктуры стратэгічнай важнасці», – цытуе выданне паведамленне ABW.
Як сцвярджаюць у Агенцтве ўнутранай бяспекі, мужчына дзеяў у складзе міжнароднай арганізаванай злачыннай групы.
Грамадзяніна Украіны затрымалі працаўнікі вроцлаўскага аддзелу ABW. Мужчыну абшукалі і выявілі доказы спланаванага злачынства.
Затрыманаму ўкраінцу выставілі абвінавачанне ва ўдзеле ў міжнароднай арганізаванай злачыннай групе, а таксама ў планаванні дыверсійнай дзейнасці на тэрыторыі Польшчы на замову расейскіх спецслужбаў.
Мужчыну агражае да 12 гадоў зняволення. Затрыманага ўзялі пад варту.
Зміцер Міраш belsat.eu
