Працаўнікі магілёўскага ГУБАЗіКу выявілі ў 65-гадовага жыхара абласнога цэнтру боепрыпасы і запасныя часткі да агнястрэльнай зброі. Увесь арсенал пенсіянер захоўваў ва ўласным гаражы, паведамляе прэсавая служба МУС.
У 65-гадовага пенсіянера з Магілёва сілавікі канфіскавалі больш за 10 тысяч патронаў да наразной зброі, у тым ліку да пісталетаў Макарава і рэвальвера, аўтамата Калашнікава, спартовы і паляўнічы карабін. Увесь арсенал пенсіянер захоўваў у гаражы. А ў доме пажылога чалавека працаўнікі ГУБАЗіКу нібыта выявілі незарэгістраваныя пісталеты ТТ, Марголіна, пісталет-ракетніцу, паляўнічую стрэльбу, запасныя часткі да пісталета Макарава, больш за 7 тысяч патронаў да наразной агнястрэльнай зброі.
Паводле МУС, крыніца паходжання зброі пакуль не вядомая.
Следчыя завялі крымінальную справу.
Раней у Менску сілавікі затрымалі 65-гадовага пенсіянера Адама Шпакоўскага, у кватэры якога нібыта знайшлі € 65 тысячаў і $ 87 тысячаў. Пры гэтым пенсія Адама Шпакоўскага не перавышае 280 рублёў.
СК belsat.eu