Аляксандр Лукашэнка 13 чэрвеня распавёў, навошта яму патрэбная ядравая зброя, і назваў умовы яе выкарыстання з тэрыторыі Беларусі. Пра гэта паведамляе БелТА.
Аляксандр Лукашэнка падкрэсліў, што гэта не Расея імкнецца размясціць ядравую зброю ў Беларусі, а ён сам настойліва патрабаваў гэтага, каб гарантаваць уласную бяспеку.
«Я думаю, наўрад ці камусьці захочацца ваяваць з краінай, якая мае такую зброю. Гэта зброя стрымлівання», – сказаў ён.
Калі ж нікога стрымаць такім чынам не ўдасца, Лукашэнка паабяцаў «неадкладны» адказ.
«Ніякага вагання не будзе, калі толькі супраць нас будзе агрэсія», – чарговы раз заявіў ён.
Ядравую зброю Пуцін і Лукашэнка плануюць размясціць у Беларусі 7–8 ліпеня – напярэдадні саміту NATO ў Вільні.
Пры гэтым у ЗША пакуль «не бачылі ніякіх прыкметаў таго, што перамяшчэнне ядравай зброі хутка пачнецца або ўжо адбываецца», – кажа каардынатар стратэгічных камунікацыяў у Радзе нацыянальнай бяспекі Джон Кірбі.
У сваю чаргу камандуючы аб’яднанымі сіламі ЗСУ генерал-лейтэнант Сяргей Наеў заявіў, што Расея перакінула ў Беларусь пакуль толькі носьбіты ядравай зброі, самой ядравай зброі яшчэ няма і не вядома, ці будзе яна ўвогуле перададзеная.
Але нават, калі ядравая зброя будзе пастаўленая ў Беларусь, прадстаўнікам мясцовага рэжыму яе давяраць не збіраюцца. Паводле дамовы, якую падпісалі міністры абароны Віктар Хрэнін і Сяргей Шайгу, Расея не мае намеру перадаваць кантроль над нестратэгічнай ядравай зброяй Беларусі. Ці выкарыстоўваць яе, будзе вырашаць Масква.
Якуб Хруст belsat.eu