Улады ва ўсходняй Лівіі заявілі, што як мінімум 2000 чалавек загінулі і яшчэ тысячы прапалі без вестак пасля моцнай паводкі, якая абрынулася на горад Дэрна пасля магутнага шторму і дажджу. Пра гэта паведамляе Reuters.
Шторм разбурыў дамбу, вада змыла цэлыя кварталы Дэрны з жыхарамі ў мора. Колькасць зніклых без вестак можа дасягаць 5-6 тысячаў чалавек. Адпаведныя звесткі прывёў прадстаўнік Лівійскай нацыянальнай арміі, якая кантралюе ўсход Лівіі.
Дэрна аказалася адрэзаная ад свету. «Няма інтэрнэту, няма электрычнасці… Маштабы катастрофы ў горадзе растуць з кожнаю хвілінаю», – заявіў Al Jazeera Гані Шэніб, прэзідэнт Нацыянальнай рады ў справе амерыканска-лівійскіх стасункаў.
Паводле Шэніба, шторм выклікаў раптоўнае і рэзкае павелічэнне воднай нагрузкі, што прывяло да поўнага разбурэння галоўнай дамбы гораду: «Чакаецца, што лічбы вырастуць… Прынамсі да 5000 ахвяраў».
Акрамя Дэрны, таксама пацярпелі гарады Бэнгазі, Суса і Аль-Мадж на ўсходзе краіны, паведамляе Бі-Бі-Сі. Улады на ўсходзе Лівіі ўвялі каменданцкую гадзіну.
Глеб Нержын belsat.eu
