Удзельнікі так званай Вялікай Айчыннай вайны, якія жывуць у Беларусі, атрымаюць 4 тысячы рублёў кожны да Дня Перамогі. Гэтая лічба прапісаная ў пастанове ўраду, апублікаванай на Нацыянальным прававым інтэрнэт-партале. Летась выплацілі кожнаму 2 тысячы.
4 тысячы рублёў мусяць выплаціць інвалідам і ўдзельнікам Вялікай Айчыннай вайны, а таксама асобам, якія ўдзельнічалі ў баявых дзеяннях да 3 верасня 1945 года. Такую ж грашовую дапамогу атрымаюць тыя, хто пасля вайны размініраваў тэрыторыі і аб’екты.
Летась гэтым асобам прызначылі 2 тысячы рублёў.
2 тысячы рублёў (летась было 1100) атрымаюць:
- узнагароджаныя ардэнамі і медалямі СССР за працу і службу ў тыле ў гады вайны;
- асобам, якія працавалі на аб’ектах супрацьпаветранай абароны, на будаўніцтве абарончых збудаванняў, аэрадромаў, на прыфрантавых участках чыгункі і аўтадарог;
- тым, хто працаваў у блакадным Ленінградзе і быў узнагароджаны медалём «За абарону Ленінграду», а таксама асобам, якія атрымалі знак «Жыхару блакаднага Ленінграду».
1 тысячу рублёў (летась – 850 рублёў) пералічаць:
- чальцам сем’яў вайскоўцаў, партызанаў і падпольшчыкаў, загінулых або зніклых у гады вайны;
- былым вязням канцлагераў і гета;
- інвалідам, якія атрымалі раненні, звязаныя з баявымі дзеяннямі ў час вайны.
Паводле звестак Міністэрства працы і сацыяльнай абароны, на сярэдзіну мінулага года, у Беларусі жыве 1,5 тысячы ветэранаў і 8,5 тысяч грамадзянаў, якія пацярпелі ад наступстваў вайны.
Сёлета будзе адзначацца 80-годдзе вызвалення Беларусі ад нямецкай акупацыі, з гэтай нагоды ветэранаў узнагародзяць юбілейным медалём.
Сцяпан Кубік belsat.eu
