У Іванаўскай вобласці Расеі разбіўся вайскова-транспартавы самалёт Іл-76. У яго загарэўся рухавік, паведамляе «Интерфакс» са спасылкаю на расейскае Міністэрства абароны. На борце былі 15 асобаў, усе яны, імаверна, загінулі.
Паводле афіцыйнай версіі, рухавік загарэўся «пры ўзлёце для выканання планавага задання». На борце Іл-76 былі 8 чальцоў экіпажу і 7 пасажыраў.
«Прычынаю катастрофы стаўся пажар аднаго з рухавікоў», – заявілі ў Міністэрстве абароны Расеі.
На месцы здарэння знойдзеныя дзесяць целаў. Пракрамлёўскі Telegram-канал «Shot» піша, што, імаверна, загінулі ўсе, хто быў на борце. Паводле звестак каналу «Baza», Іл-76 выконваў навучальны палёт.
Папярэдні Іл-76 Расея страціла ў канцы студзеня ў Белгародскай вобласці. Як сцвярджала Масква, на гэтым самалёце везлі ваеннапалонных для абмену з Украінаю, судна збілі ЗСУ. У Кіеве датычнасці да здарэння не прызналі.
Сцяпан Кубік belsat.eu
