Міністр замежных справаў Расеі прыляціць у Менск 19 студзеня, паведаміла афіцыйная прадстаўніца ведамства Марыя Захарава. Сяргей Лаўроў возьме ўдзел у супольным пасяджэнні калегіяў МЗС дзвюх краінаў і сустрэнецца з Аляксандрам Лукашэнкам, перадае агенцтва «РИА Новости».
Спікерка МЗС Расеі Марыя Захарава на брыфінгу паведаміла, што кіраўнік ведамства Сяргей Лаўроў 19 студзеня наведае з візітам Беларусь. Асноўная нагода – супольнае пасяджэнне калегіяў міністэрстваў дзвюх краінаў. Ён таксама плануе перамовы з Аляксандрам Лукашэнкам і беларускім калегам Сяргеем Алейнікам.
Па выніках сустрэч плануецца падпісанне пастановы пасяджэння калегіяў, плану кансультацыяў паміж міністэрствамі на гэты год і нейкага міжурадавага мемарандуму.
Гэты візіт Лаўрова ў Менск планаваўся напрыканцы лістапада мінулага года. Але паездка не адбылася праз смерць тагачаснага міністра замежных справаў Беларусі Уладзіміра Макея.
Сяргей Крот belsat.eu
