Шведская мэблевая кампанія IKEA хоча спагнаць з беларускага актывіста Пятра Маркелава 8,5 тысяч еўра за шкоду, якую ён нанёс падчас акцыі пратэсту ў адной з крамаў у Чэхіі. Пра гэта актывіст паведаміў у сваім Instagram.
Беларускі актывіст правёў акцыю пратэсту ў мэблевай краме IKEA у Празе ў лістападзе 2022 года. Маркелаў агарадзіў мэблю стужкай, разрубіў сякерай дзве тумбачкі (яны нібыта былі зробленыя ў Беларусі), абліў іх фарбай і праз рупар па-ангельску абвясціў, што робіць гэта, каб пратэставаць супраць супрацы IKEA з уладамі Беларусі.
Як паведаміў чалавек, які здымаў акцыю, Маркелаў адмыслова выбраў момант, калі ў залі не было дзяцей, і пасля спакойна чакаў прыезду паліцыі. Яго затрымалі на 6 гадзінаў і пасля вызвалілі.
Нагадваем, раней у заходніх медыя з’явілася інфармацыя, што шведская кампанія IKEA выкарыстоўвала працу беларускіх вязняў, у тым ліку палітычных
Алена Рувіна belsat.eu