Ціханоўская выступіла за «Еўразвяз ад Малагі да Менску, ад Лісабона да Тбілісі»
У іспанскай Малазе абраная прэзідэнтка Беларусі Святлана Ціханоўская ўзяла ўдзел у Кангрэсе Еўрапейскіх сацыялістаў і дэмакратаў і выступіла перад кіраўнікамі дзяржаваў і ўрадаў, палітычных лідараў і актывістаў з усёй Еўропы. Пра гэта «Белсату» паведамілі ў офісе беларускай лідаркі.
Партыя Еўрапейскіх сацыялістаў аб’ядноўвае сацыял-дэмакратычныя і прагрэсіўныя партыі Еўропы і з’яўляецца адной з галоўных у Еўразвязе. Падчас выступу Святланы Ціханоўскай у залі прысутнічалі канцлер Нямеччыны Оляф Шольц, прэм’ер і міністр замежных спраў Іспаніі Пэдра Санчэс і Хасэ Альбарэс, ценявы міністр замежных спраў Вялікай Брытаніі Дэйвід Лэмі, міністарка замежных спраў Славеніі Таня Фаён і шмат іншых палітыкаў свету – агулам каля 1000 дэлегатаў.
Ціханоўская акцэнтавала ўвагу на ролі беларускіх сацыял-дэмакратаў у абароне незалежнасці нашай краіны – прадстаўнікоў партыяў «Грамада» і «Народная Грамада», якія, нягледзячы на палітычныя рэпрэсіі «не здаліся і працягваюць змагацца за вольную Беларусь».
Палітык таксама падкрэсліла важнасць еўрапейскага выбару для беларусаў і суседніх краінаў:
«Без Беларусі, Украіны ці Малдовы еўрапейскі праект ніколі не будзе завершаны. Еўразвяз ад Малагі да Менску, ад Лісабона да Тбілісі, – гэта не проста мара. Гэта мэта.
Нашая мэта – пабудаваць краіну, дзе сацыяльныя правы гарантаваныя, а не проста дэкларуюцца. Мэта – вярнуць сваю краіну да дэмакратыі. Таму што пры тыраніі няма незалежных прафсаюзаў, дасведчанасці пра клімат, правоў ЛГБТК і гендарнай роўнасці. І, вядома ж, няма ніякіх выбараў».
Таксама Ціханоўская заклікала ўдзельнікаў кангрэсу далучыцца да Дня салідарнасці з Беларуссю 12 лістапада.
Апошнім часам абраная прэзідэнтка Беларусі ўсё часцей кажа пра важнасць еўрапейскага выбару для Беларусі. 13 верасня яна, выступаючы з прамовай перад дэпутатамі Еўрапарламенту, пацвердзіла, што галоўная стратэгічная мэта дэмакратычных сілаў – гэта Еўразвяз.
«Свет павінен перастаць думаць пра Беларусь як пра частку Расеі. Мы былі часткай Еўропы за шмат стагоддзяў да таго, як у Беларусь прыйшла Расея. Павага і абарона беларускага еўрапейскага выбару – вось што мусіць быць неад’емнай часткай палітыкі Захаду», – заявіла палітык на Варшаўскім форуме бяспекі ў кастрычніку.
Якуб Хруст belsat.eu
