Аляксандр Лукашэнка даручаў прэм’ер-міністру Раману Галоўчанку наладзіць сувязь з Польшчаю. Пра гэта Лукашэнка заявіў падчас наведання менскага аэрапорту. Ён разлічвае, што ў 2024–2025 гадах «адбудуцца сурʼёзныя змены ў свеце ў тым ліку».
«Цяпер мы жывём найперш за кошт Усходу – супрацоўнічаем з Расеяй, Кітаем. Але не трэба забывацца пра высокатэхналагічны Захад. Яны побач, яны нашыя суседзі – Еўразвяз. І стасункі з імі траціць нельга. Мы да гэтага гатовыя, але з улікам нашых уласных інтарэсаў», – заявіў Лукашэнка.
Прагучалі і абвінавачанні Польшчы ў нагнятанні ды гіпотэза, што ўсё зменіцца пасля парламенцкіх выбараў у гэтай краіне:
«З палякамі трэба размаўляць. Я даручаў прэм’ер-міністру звязацца з імі. Калі яны жадаюць, давайце размаўляць, наладжваць стасункі. Мы суседзі, а суседзяў не выбіраюць, яны ад Бога. Але ў іх 15 кастрычніка парламенцкія выбары і, вядома, ім трэба нагнятаць абстаноўку, каб паказаць, што яны правільна ўзбройвалі і пераўзбройвалі краіну. Яны шмат чаго патрабуюць ад нас і просяць, але мы на гэта пайсці не можам, бо гэта супярэчыць нашым інтарэсам».
Лукашэнка таксама заявіў пра гатовасць «хоць заўтра» прыняць заходнія авіякампаніі, калі тыя пастановяць вярнуцца.
Алена Рувіна belsat.eu