Арына Сабаленка прагуляла ў фінале «US Open». Пераможцаю сталася амерыканка Коўры Гаф. Нягледзячы на гэтую паразу, Сабаленка ўзначаліла сусветны рэйтынг тэнісістак.
Тэнісістка Арына Сабаленка прагуляла ў фінале «US Open». Матч адбыўся ў ноч на нядзелю паводле беларускага часу. У выўначальнай сустрэчы яна саступіла 19-гадовай амерыканцы Коўры Гаф. Лік матчу – 6:2, 3:6, 2:6.
Для Гаф гэта першая перамога на турніры такога рангу.
На прэс-канферэнцыі пасля гульні Сабаленка прызналася, што не дала рады эмоцыям, аднак супакойвае лідарства ў сусветным рэйтынгу.
«Напэўна, таму я не ў супердэпрэсіі. Добра, што я магу сказаць, што была нумар адзін у свеце, аднак я сапраўды хачу скончыць год у рангу нумар адзін. Таму я па-ранейшаму пазітыўная і матываваная», – цытуе беларуску сайт Жаночай тэніснай асацыяцыі.
Арына Сабаленка цяпер на першым месцы ў сусветным рэйтынгу «WTA». Прадстаўніца Польшчы Іга Сьвёнтэк, пераможца леташняга «US Open», апусцілася на другое месца, саступіўшы ў сёлетнім турніры ў 1/8 фіналу. На трэцяе месца перасунецца Коўры Гаф.
Сяргей Крот belsat.eu
