Прэзідэнт Азербайджану прызначыў новага амбасадара ў Беларусі – 72-гадовага генерал-палкоўніка Мэхэрэма Эліева. Дасюль той займаў пасаду памочніка кіраўніка дзяржавы.
Прэзідэнт Азербайджану Ільхам Аліеў змяніў сёння амбасадараў рэспублікі адразу ў трох краінах: Беларусі, Малдове і Румыніі.
Дыпламатычнае прадстаўніцтва ў Беларусі ўзначаліў 72-гадовы генерал-палкоўнік Мэхэрэм Абыш аглу Эліеў. Дасюль ён займаў пасаду памочніка прэзідэнта – кіраўніка аддзелу вайсковых пытанняў прэзідэнцкай адміністрацыі. Адначасова азербайджанскі лідар звольніў генерала з вайсковай службы.
Асобным загадам Ільхам Аліеў звольніў Юльві Вагіф аглу Бахшэліева, які быў амбасадарам у Беларусі, а таксама прадстаўніком Азербайджану ў статутных органах СНД. Ён прызначаны паслом у Малдове.
Прычыны гэтых кадравых перастановак не называюцца.
Бахшэліеў узначальваў амбасаду Азербайджану ў Беларусі з ліпеня 2021 года.
Сцяпан Кубік belsat.eu
