Pozirk.online падлічыў, колькі беларускіх выданняў, прызнаных МУС і КДБ экстрэмісцкімі фармаваннямі. Выйшла круглая лічба – 20.
Дваццатым з ліку медыярэсурсам, унесеным 24 кастрычніка ў спіс экстрэмісцкіх фармаванняў, сталася рэгіянальнае выданне ex-press.livе (раней – ex-press.by). Сайт стварылі журналісты недзяржаўнай газеты «Барысаўскі кур’ер», якая выходзіла з 1996 да 2005 года і была закрытая пасля пазову Менскага аблвыканкаму ў Гаспадарчы суд Менскай вобласці. Улады тады заяўлялі, што дзейнасць газеты супярэчыць дзяржаўным і грамадскім інтарэсам.
У жніўні 2021 года сайт заблакавалі на тэрыторыі Беларусі. Суд Барысаўскага раёну двойчы – у кастрычніку 2021 года і ў лютым 2023-га – прызнаў змест сайту экстрэмісцкімі матэрыяламі. Рэдакцыя пасля пачатку пераследу з’ехала з Беларусі.
Сярод іншых выданняў, прызнаных уладамі Беларусі экстрэмісцкімі фармаваннямі:
- БелаПАН (рашэнне прынятае 1 лістапада 2021 года)
- тэлеканал «Белсат» (3 лістапада 2021 года)
- радыё «Свабода» (23 снежня 2021 года)
- «Наша ніва» (14 студзеня 2022 года)
- «Бобруйск Online» (22 лютага 2022 года)
- «Флагшток» (29 красавіка 2022 года)
- kyky.org (6 траўня 2022 года)
- «Честная газета» (20 траўня 2022 года)
- «Еўрарадыё» (20 ліпеня 2022 года)
- «Хартыя’97» (30 жніўня 2022 года)
- Hrodna.life (11 лістапада 2022 года)
- самавольнае выданне «Вестники» (9 снежня 2022 года)
- «Маланка Медиа» (15 лютага 2023 года)
- «Брестская газета» (28 лютага 2023 года)
- «MOST Media» (17 траўня 2023 года)
- homeldays.org («Штодзень Гомель») (23 траўня 2023 года)
- тэлеграм-канал «Инсайдер» (29 траўня 2023 года)
- zerkalo.io (9 чэрвеня 2023 года)
- тэлекампанія «Ранак» у Светлагорску (5 верасня 2023 года)
Агулам у спісе экстрэмісцкіх фармаванняў цяпер 157 пазіцыяў.
На дзень 9 лістапада 2023 года за кратамі ў Беларусі застаюцца 33 журналісты і работнікі медыяў.
Марыя Міхалевіч belsat.eu
