Беларусь выйшла з пагаднення з Украінай аб атэстацыі навуковых і навукова-педагагічных кадраў
Урад Беларусі спыніў дзеянне пагаднення з Украінай аб супрацы ў галіне атэстацыі высокакваліфікаваных навуковых і навукова-педагагічных кадраў.
Адпаведную пастанову падпісалі 3 лістапада і апублікавалі на Нацыянальным прававым інтэрнэт-партале 9 лістапада. Яна ўступіла ў моц з дня прыняцця.
Пагадненне з Украінай аб супрацы ў галіне атэстацыі высокакваліфікаваных навуковых і навукова-педагагічных кадраў было падпісанае 16 траўня 2000 года ў Менску.
9 красавіка 2022 года Украіна выйшла з пагаднення з Беларуссю аб узаемным прызнанні дакументаў аб адукацыі. Тады ж украінскім бокам былі ануляваныя пагадненні аб узаемным прызнанні навуковых ступеняў і аб супрацы ў галіне атэстацыі навуковых і навукова-педагагічных кадраў найвышэйшай кваліфікацыі.
Урад Беларусі спыніў дзеянне пагаднення з Украінай аб узаемным прызнанні і эквівалентнасці дакументаў аб адукацыі і навуковых званнях толькі 17 кастрычніка 2023 года. Гэтае пагадненне дзеяла з 1998-га.
7 лістапада Украіна спыніла дзеянне пагаднення з Беларуссю аб супрацы ў барацьбе са злачынствамі ў галіне эканомікі, падпісанае краінамі СНД 12 красавіка 1996-га. За дзень да гэтага, 6 лістапада, было разарванае пагадненне аб супрацы ў барацьбе са злачыннасцю, заключанае 25 лістапада 1998-га. Пагадненне прадугледжвала ўзаемадзеянне дзяржаваў у вышуку асобаў, якія хаваюцца ад крымінальнага пераследу.
Марыя Міхалевіч belsat.eu
