Беларусы і расейцы будуць удзельнічаць у Алімпіядзе-2024 як «індывідуальныя нейтральныя спартоўцы»
Міжнародны алімпійскі камітэт дапусціў беларускіх і расейскіх спартоўцаў да ўдзелу ў Алімпіядзе 2024 года ў Парыжы, аднак толькі пры ўмове выступу ў нейтральным статусе. Украіна выступіла з асуджэннем гэтага рашэння.
«Выканаўчая рада Міжнароднага алімпійскага камітэту вырашыла, што індывідуальныя нейтральныя спартоўцы, якія прайшлі кваліфікацыю пра дзейсныя кваліфікацыйныя сістэмы міжнародных федэрацыяў на гульнявым полі, будуць дапушчаныя да ўдзелу ў Алімпійскіх гульнях у Парыжы 2024 года ў адпаведнасці з умовамі, выкладзенымі ніжэй. Індывідуальныя нейтральныя спартоўцы – спартоўцы з расейскім ці беларускім пашпартам. Будуць ужывацца строгія ўмовы адбору, заснаваныя на рэкамендацыях выканаўчага камітэту МАК ад 28 сакавіка 2023 года для міжнародных федэрацыяў і арганізатараў міжнародных спартовых мерапрыемстваў», – гаворыцца ў рашэнні МАК.
Кваліфікацыю на сённяшні дзень прайшлі 8 нейтральных спартоўцаў з Расеі і 3 з Беларусі. Каманды да ўдзелу не дапускаюцца.
На афіцыйных пляцоўках Алімпійскіх гульняў спартоўцам з Беларусі і Расеі нельга будзе дэманстраваць сцягі ці спалучэнні нацыянальных колераў і іншыя сімвалы сваіх краінаў, а таксама выконваць свой дзяржаўны гімн.
У Парыж не будуць запрошаныя і акрэдытаваныя як расейскія, так і беларускія чыноўнікі.
На Алімпіяду нават у нейтральным статусе не дапусцяць спартоўцаў, якія выказваліся ў падтрымку ўварвання Расеі ва Украіну, а таксама звязаныя з ваеннымі ці сілавымі структурамі ў Расеі ці Беларусі.
29 верасня Генеральная асамблея Міжнароднага паралімпійскага камітэту таксама пастанавіла дапусціць беларускіх і расейскіх атлетаў да Паралімпіяды.
Украіна асудзіла рашэнне Міжнароднага алімпійскага камітэту і не выключае, што будзе байкатаваць Алімпіяду, заявіў кіраўнік Міністэрства моладзі і спорту Украіны Мацвей Бедны. Ён назваў допуск беларускіх і расейскіх спартоўцаў безадказным.
«Мы рашуча асуджаем безадказнае рашэнне сябраў выканаўчага камітэту МАК. Адзіная краіна, якая тры разы парушала алімпійскае замірэнне – Расея. Адзіная краіна, якая хоча правесці альтэрнатыву Алімпіядзе – Расея. Адзіная краіна, якая пагражае прыехаць на Алімпіяду на танках – Расея. Што яшчэ павінна зрабіць Расея, каго яшчэ павінна забіць Расея, каб Міжнародны алімпійскі камітэт нарэшце зняў ружовыя акуляры ў дачыненні краіны-тэрарыстыкі?» – гаворыцца ў заяве Міністэрства спорту.
Алімпійскія гульні пройдуць у Парыжы з 26 ліпеня па 11 жніўня 2024 года.
Марыя Міхалевіч belsat.eu
