У Магілёве ўстанавілі сяміметровы герб гораду, які быў зацверджаны каралём Рэчы Паспалітай Янам II Казімірам у 1661 годзе. Аб гэтым піша тэлеграм-канал «Могилев Онлайн». Аднак нагадаем, што ў Беларусі людзей затрымліваюць за выяву Пагоні.
Герб устанавілі на скрыжаванні вуліц Каштанавай, Крупскай і Кулібіна.
«Сімвал Магілёва ўяўляе сабой тры сярэбраныя вежы. У адчыненых варотах сярэдняй – срэбны рыцар у даспехах з паднятым над галавой мячом. Уверсе над варотамі на круглым чырвоным шчыце пад дахам цэнтральнай вежы знаходзіцца сярэбраны ўзброены вершнік з мячом і шчытом», – паведамляе «Могилев Онлайн».
Зверху канструкцыі знаходзіцца варыянт герба Вялікага княства Літоўскага Пагоня. Яго зацвердзілі пасля заканчэння Руска-польскай вайны Магілёву за баявыя заслугі.
Нагадаем, што другі герб Магілёў атрымаў у 1661 годзе падчас Магілёўскага паўстання. Вынікам яго стала выгнанне (раней упушчаных) маскавітаў у час вайны Рэчы Паспалітай з Масковіяй, адзначае тэлеграм-канал «Historyja».
Аднак за выяву герба Пагоня на беларусаў заводзяць адміністрацыйныя справы нібыта за «пікетаванне». Так, напрыклад, у жніўні сілавікі затрымалі мужчыну за выяву Пагоні на танку ў камп’ютарнай гульні «World of Tanks». Тады ГУБАЗіК сцвярджаў, што яго здалі іншыя гульцы. Таксама беларусаў затрымлівалі за выяву герба Пагоні на аўтамабільным знаку, працоўным кубку, чахле ад тэлефона і за татуіроўкі.
Алена Рувіна belsat.eu
