Суд над выкладчыцай Наталляй Дулінай і здзекі ў наваполацкай калоніі. Рэпрэсіі за 7 лютага
Улады Беларусі працягваюць палітычныя рэпрэсіі супраць грамадзянаў краіны. «Белсат» сабраў вядомыя факты пераследу 7 лютага.
У Менскім абласным судзе 7 лютага пачалі судзіць чальца Каардынацыйнай рады і былую выкладчыцу МДЛУ Наталлю Дуліну, якая падтрымала забастоўку і пратэсты студэнтаў. Яе абвінавачваюць паводле ч. 1 арт. 361-4 («Садзейнічанне экстрэмісцкай дзейнасці»), ч. 1 арт. 342 («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») КК. Суд над Наталляй зрабілі закрытым.
Расяянку і былую супрацоўніцу «Белагра» Кацярыну Якаўлеву асудзілі за ўдзел у пратэстах паводле ч. 1 арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»). Суддзя прызначыла Кацярыне адзін год пазбаўлення волі ў калоніі ва ўмовах агульнага рэжыму. Яна была затрымана пасля вобшукаў у арганізацыі 29 верасня 2022 года.
Сілавікі апазналі мужчыну па фотаздымках з пратэстаў – яго судзілі паводле ч. 1 арт. 342 («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») КК. Нібыта ён некалькі разоў удзельнічаў у менскіх акцыях пратэсту і выходзіў на праезджую частку. У выніку Дзмітрыю Бурагу прызначылі тры «хатняй хіміі».
У Менску былога студэнта ЕГУ Юрыя Хрысталюбава асудзілі на два з паловай гады «хатняй хіміі» за ўдзел у паслявыбарчых пратэстах паводле ч. 1 арт. 342 КК («Арганізацыя ці падрыхтоўка дзеянняў, якія груба парушаюць гармадскі парадак, альбо актыўны ўдзел у іх»). Пасля затрымання хлопца сілавікі сцвярджалі, што з Юрыем у 2020 годзе нібыта звязваліся спецслужбы Літвы і прапаноўвалі грошы за ўдзел у пратэстах.
Стала вядома, што баранавіцкі актывіст Мікалай Чарнавус-малодшы затрыманы па крымінальнай справе, але якой – невядома. Яго пасля трох содняў не адпусцілі, бо адміністрацыйная справа перацякла ў крымінальную. Летам 2021 Мікалая арыштоўвалі на тры дні, а затым пакаралі штрафам у 20 базавых. Мікалая 2 лютага затрымлівала 10 міліцыянтаў, якія правялі дома вобшук.
Журналіст Дзяніс Івашын патрапіў у шпіталь пасля этапавання з Горадні ў магілёўскую калонію. У яго ўзнялася высокая тэмпература – да 39 градусаў, таму замест каранціну яго адправілі ў шпіталь.
«Каранціну як такога не было, бо ў такім стане Дзяніс, натуральна, адразу патрапіў у шпіталь. Адчуваў сябе надта кепска, нават не мог нам пісаць», – паведамляюць аўтары тэлеграм-каналу «Дзяніс Івашын».
Летась у верасні Дзяніса Івашына асудзілі на 13 гадоў і 1 месяц калоніі ўзмоцненага рэжыму.
Сілавікі затрымалі індывідуальнага прадпрымальніка Сяргея Леанюка, якога абвінавачваюць у «распальванні варожасці да рускіх». З ім запісалі «пакаяннае» відэа, на якім ён кажа, што нібыта пакідаў каментары ў тэлеграме. Сцвярджаецца, што супраць мужчыны заведзеная крымінальная справа па арт.130 КК («Распальванне сацыяльнай варожасці».
Праваабаронцы «Вясны» прыводзяць статыстыку рэпрэсіяў за студзень. Так, па «пратэсных» крымінальных справах асуджана не менш за 50 чалавек, з якіх 13 жанчын і 37 мужчын. Ім агулам прысудзілі:
- 111 гадоў і 7 месяцаў пазбаўлення волі;
- 4 гады і 6 месяцаў «хіміі»;
- 31 год і 3 месяцы «хатняй хіміі»;
- 82 510 рублёў штрафаў;
- 9 месяцаў арышту;
- 5 гадоў пазбаўлення права займаць пасады, звязаныя з выкананнем функцый прадстаўніка ўлады ў органах унутраных спраў.
Па «пратэсных» крымінальных справах у студзені суды ўжывалі пакаранне, звязанае з пазбаўленнем волі, у 65% выпадкаў.
Алена Рувіна belsat.eu
