Камітэт дзяржбяспекі абнавіў «Пералік арганізацыяў і фізічных асобаў, датычных да тэрарыстычнай дзейнасці». У апублікаваны на сайце ведамства спіс улучылі 7 асобаў, у тым ліку палітвязня Эдуарда Бабарыку.
Улучэнне Эдуарда Бабарыкі ў «пералік тэрарыстаў» абгрунтаванае тым, што набыў моц вырак аб прызнанні палітвязня «вінаватым у здзяйсненні злачынстваў, прадугледжаных артыкулам 130 Крымінальнага кодэксу Рэспублікі Беларусь». Гэта артыкул «Распальванне расавай, нацыянальнай, рэлігійнай або іншай сацыяльнай варожасці або разладу».
У тэрарыстычных злачынствах Бабарыку-малодшага не абвінавачвалі. За нібыта «распальванне іншай сацыяльнай варожасці», «суарганізацыю дзеянняў, што груба парушаюць грамадскі парадак» і «ухіленне ад выплаты падаткаў» маладзёну прызначылі 8 гадоў калоніі ўзмоцненага рэжыму. Пры гэтым не быў залічаны тэрмін яго знаходжання ў СІЗА. Такі вырак у ліпені сёлета агучыў суддзя Менскага абласнога суда Уладзімір Арэшка.
28 лістапада калегія Вярхоўнага суда на чале з суддзём Ігарам Букатам пакінула прысуд без зменаў.
У «тэрарыстычны пералік» КДБ улучыў яшчэ Максіма Варнэля, якога абвінавачваюць у масавых беспарадках, а таксама Кірыла Крошкіна і Аляксандра Сігіневіча, якіх абвінавачваюць у распальванні варожасці.
Акрамя таго, у спісе цяпер – Кацярына Джыг і Яўген Верхаводкін, асуджаныя паводле артыкулу аб закліках да санкцыяў, ды Іван Янчук, якому вынеслі прысуд паводле артыкулу аб распальванні варожасці.
Сцяпан Кубік belsat.eu