«Белсат» падводзіць вынікі 559-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 5 верасня чытайце ў нашым аглядзе.
На паўночным усходзе Украіны Узброеныя сілы РФ працягваюць наступаць у ваколіцах сяла Новаягораўка ў Сватаўскім раёне Луганскай вобласці. Паводле ўкраінскага камандавання, пакуль сілам абароны краіны ўдаецца стрымліваць наступ праціўніка.
Акрамя гэтага расейцы атакавалі ў ваколіцах Белагораўкі ў Севераданецкім раёне, а таксама не дасягнулі поспеху.
У сваю чаргу Збройныя сілы Украіны атакавалі каля населеных пунктаў Торскае і Дзіброва ў Краматорскім раёне Данецкай вобласці. У Міністэрстве абароны РФ сцвярджаюць, што ўсе тры атакі ЗСУ былі адбітыя.
На бахмуцкім кірунку Збройныя сілы Украіны наступаюць на поўдні ад аднайменнага раённага цэнтру.
Расейскі ваенкор Сямён Пегаў піша, што цягам содняў украінцы прасунуліся ў заходняй частцы сяла Клішчэеўка і ўзялі пад свой кантроль участак дарогі, якая ідзе цераз населены пункт.
У адказ УС РФ контратакавалі, імкнучыся вярнуць страчаныя пазіцыі, але поспеху не дасягнулі.
Ранкам 5 верасня ўкраінскія вайскоўцы актывізаваліся на ўсходзе ад так званага ўрэмеўскага выступу і атакавалі пазіцыі праціўніка ў населеных пунктах Новаданецкае і Новамаёрскае.
Тэлеграм-канал «Воин DV» піша, што таксама ЗСУ спрабуюць рухацца ўздоўж лесапалосаў у бок сёлаў Старамлынаўка і Керменчык (на паўднёвым захадзе ад Новаданецкага), імаверна, плануючы ўдарыць паміж зонамі адказнасці розных брыгадаў войскаў РФ.
Палкоўнік так званай ДНР Аляксандр Хадакоўскі адзначае, што атакам ЗСУ на Новаданецкае і Новамаёрскае папярэднічалі масіраваныя артылерыйскія абстрэлы прылеглых участкаў фронту, у выніку чаго ўдалося знішчыць мінныя палі перад сёламі. Такія дзеянні дазволілі ўкраінцам прымяніць цяжкую тэхніку для дастаўкі асабовага складу наўпрост да пазіцыяў праціўніка.
Тэлеграм-канал 46-й аэрамабільнай брыгады ЗСУ, спаслаўшыся на свае крыніцы, піша пра поспехі сілаў абароны краіны каля Новамаёрскага.
Разам з тым прарасейскія крыніцы сцвярджаюць, што ўсе атакі ўкраінцаў на гэтым участку фронту былі адбітыя.
У гэты ж час на самім урэмеўскім выступе фіксуюцца баі каля сёлаў Старамаёрскае і Ураджайнае.
На мелітопальскім кірунку ўкраінскія вайскоўцы развіваюць наступ на поўдні ад гораду Арэхаў.
Цяжкія баі фіксуюцца каля сяла Вербавае, у асноўным – на паўднёвым захадзе ад населенага пункту, дзе ЗСУ намагаюцца прабіцца да лакальных вышыняў. Байцы 46-й брыгады фіксуюць поспехі сілаў абароны на гэтым участку, хоць і адзначаюць актыўныя дзеянні абодвух бакоў канфлікту, у выніку чаго асобныя пазіцыі часцяком пераходзяць з рук у рукі.
Прасоўванні ЗСУ каля Вербавага пацвярджаюць і аналітыкі праекту Deepstate.
Адначасова з гэтым украінцы наступаюць каля суседняга сяла Новапракопаўка, дзе за содні ўдалося заняць прынамсі адзін з важных апорных пунктаў праціўніка.
Расейцы ў сваю чаргу сцягваюць да населенага пункту рэзервы, каб стабілізаваць лінію фронту.
У 46-й аэрамабільнай брыгадзе ЗСУ адзначаюць, што павольныя прасоўванні на мелітопальскім кірунку ў першую чаргу звязаныя з асаблівасцямі мясцовасці, якія не дазваляюць украінцам перамяшчацца незаўважна.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Таццяна Міронава belsat.eu