СК перанакіраваў у МУС заяву гомельскага актывіста на прапагандыста Грыгорыя Азаронка
Цэнтральны апарат Следчага камітэту перанакіраваў у міністэрства ўнутраных справаў заяву на прапагандыста Грыгорыя Азаронка. Пра гэта сведчыць папера з СК, якую атрымаў аўтар скаргі, гомельскі валанцёр Ілля Міронаў. Ён мяркуе, што Азаронка трэба прыцягнуць да адказнасці за распальванне варожасці. Фота дакументу апублікавала выданне «Гомель штодзень».
Ілля Міронаў у студзені напісаў заяву ў Следчы камітэт на Грыгорыя Азаронка. Актывіст папрасіў завесці на прапагандыста крымінальную справу, сцвярджаючы, што той распальвае сацыяльную варожасць. Нагодаю стаўся артыкул і відэаролік на сайце СТВ, дзе Азаронак разважае пра вяртанне беларусаў з эміграцыі.
Міронаў атрымаў дакумент са Следчага камітэту пра тое, што ягоную заяву накіравалі ў МУС «для арганізацыі разгляду ў адпаведнасці з кампетэнцыяй».
Раней Ілля Міронаў скардзіўся ў Міністэрства інфармацыі на Telegram-канал «Жёлтые сливы». Ведамства адказала, што гэта не ў іхнай кампетэнцыі, бо канал не зарэгістраваны ў якасці сеткавага выдання, а таму не ёсць СМІ. Валанцёру параілі або звяртацца ў суд, або самастойна запатрабаваць у аўтараў «Жёлтых слив» абвяржэння паклёпу.
Міронаў – колішні палітвязень. Яго затрымлівалі паводле «справы Зельцара», судзілі за «дыскрэдытацыю Рэспублікі Беларусь». У леташнім кастрычніку валанцёру прызначылі 1,5 года калоніі і буйны штраф і вызвалілі, бо тэрмін ён адбыў пад следствам. Пасля гэтага Міронава некалькі разоў арыштоўвалі.
Сяргей Крот belsat.eu
