Каля Бабруйску невядомыя пашкодзілі арт-аб’ект «Прыпынак Алеся Адамовіча» напярэдадні 95-годдзя пісьменніка
Беларускаму пісьменніку Алесю Адамовічу 3 верасня споўнілася б 95 гадоў. За пару дзён да гэтай даты на малой радзіме літаратара, у вёсцы Глуша ў Бабруйскім раёне, невядомыя пашкодзілі ягоны партрэт на «Прыпынку Адамовіча». Наступствы вандалізму выпраўлялі мясцовыя жыхары, піша газета Бабруйскага раёну «Трыбуна працы».
У вёсцы Глуша каля Бабруйску, якую Алесь Адамовіч называў сваёй малою радзімаю (насамрэч ён нарадзіўся ў Менскай вобласці, але калі яму быў год, бацькі пераехалі на Бабруйшчыну), бабруйскія актывісты ў 2018 годзе са звычайнага аўтобуснага прыпынку зрабілі арт-аб’ект, прысвечаны пісьменніку – «Прыпынак Адамовіча». Мастак Аляксандр Благій на цэнтральнай сцяне прыпынку намаляваў партрэт літаратара, а на бакавой напісаў выказванне пра Глушу з аповесці Адамовіча «Vixi».
Сёлетні акт вандалізму на арт-аб’екце – першы з моманту яго адкрыцця. Выпраўляць шкоду ўзяліся валанцёры раённай дзіцячай школы мастацтваў у межах акцыі «Зробім наш горад прыгажэйшым».
Алесь Адамовіч – беларускі пісьменнік, публіцыст, сцэнарыст, грамадскі актывіст. Вядомы глыбокімі творамі пра Другую сусветную вайну («Карнікі», «Я з вогненнай вёскі», «Хатынская аповесць», «Вайна пад стрэхамі», «Блакадная кніга» ды інш.), сцэнаром да вядомага фільму «Ідзі і глядзі», актыўнымі намаганнямі даведацца і распавесці праўду пра Чарнобыль, змаганнем з наступствамі катастрофы на ЧАЭС, выступамі за дэмакратыю і свабоду слова.
Сапраўдная дата нараджэння Адамовіча – 3 жніўня 1926 года. Дату 3 верасня 1927 года ўпісала ў дакументы ягоная маці, каб уратаваць сына ад прымусовых працаў у Нямеччыне.
Алесь Адамовіч памёр 26 студзеня 1994 года ад інфаркту, яго пахавалі каля Глушы.
У дзень 95-годдзя пісьменніка, 3 верасня, на ягонай малой радзіме ў Глушы, у мясцовым Доме культуры а 12:00 пройдзе літаратурна-музычная імпрэза «Алесь Адамовіч – чалавек свету». Там жа будзе разгорнутая экспазіцыя «Праўда жыцця Алеся Адамовіча».
Марыя Міхалевіч belsat.eu
